La Paz er höfuðborg framkvæmdar- og löggjafarvalds Bólívíu, 68 km suðaustan Titicaca-vatns.  Þessi stærsta borg landsins er í 3250-4100 m hæð yfir sjó og er því líka hæsta höfuðborg heims.  Við komuna til borgarinnar finna gestir hennar mismikið fyrir súrefnisskorti.  Miðborgin er í djúpu og breiðu gljúfri La Paz-árinnar (Choqueyapu).  Borgin er u.þ.b. 430 m neðan Altiplano-sléttunnar í skjóli fyrir köldustu fjallavindunum.  Undanfarin ár hefur borgin byggzt upp gljúfurveggina og alla leið að jaðri Altiplano.

Alonso de Mendioza, höfuðsmaður og sigurvegari, stofnaði hana á grunni inkaþorps árið 1548 og nefndi hana Nuestra Senora de La Paz.  Árið 1825 var borgin nefnd La Paz de Avacucho til minningar um síðustu varnarorrustu í sjálfstæðisstríðunum.   Hún varð aðsetur ríkisstjórnar landsins 1898 en Sucre varð höfuðborg dómsvaldsins.  Murillotorg norðaustan árinnar er hjarta borgarinnar með stórri dómkirkju og byggingum ríkisstjórnarinnar og þingsins.  Fáar nýlendubyggingar hafa staðizt tímans tönn en gömlu, þröngu og bröttu göturnar, rauðu tígulsteinaþökin, mörg háhýsi og litríkir búningar háfjallaindíánanna með Nevado Illimani-fjall (6322m) og önnur snævi þakin fjöll í bakgrunni setja sérstakan svip á borgina.  Iðnaðurinn byggist aðallega á matvælavinnslu og framleiðslu neyzluvara.  San Andrés-háskólinn (1830), Katólski Bólivíuháskólinn (1966), Þjóðlistasafnið og Þjóðminjasafnið eru meðal margra mennta- og menningarstofnana.

Borgin er tengd perúskum og síleskum höfnum með skipum um Titicaca-vatn og járnbrautum og hraðbrautum og Argentínu og Brasilíu.  Millilandaflugvöllurinn er ofan borgarinnar á sléttunni.  Áætlaður íbúafjöldi 1988 var rúmlega 1 miljón.