Laramie er borg á hásléttunni í grennd við Snjófjöll (Snowy Range) í Wyoming-fylki.  Hún er miðstöð viðskipta, flutninga og iðnaðar í stóru landbúnaðar- og skógarhöggshéraði og framleiðir m.a. sement og timburvörur.  Hún er setur Wyoming-háskóla (1886) og Bow þjóðgarðurinn er í næsta nágrenni.  Landkönnuðir, hermenn og skinnaveiðimenn voru þarna á ferðinni löngu áður en byggð fór að myndast.  Meðal veiðimannanna var hinn franski Jacques La Ramie, sem bærinn var síðar nefndur eftir.  Rústir Sanders-virkisins (1866), sem var byggt til að vernda verka- og ferðamenn á Yfirlandsleiðinni, eru til sýnis.  Þar er líka risabrjóstmynd af Abraham Lincoln.  Áætlaður íbúafjöldi 1990 var tæplega 28 þúsund.