Samkvæmt manntalinu 1990 voru íbúarnir 453.588 og hafði fækkað um 3,4% næstliðinn áratug.  Á áttunda áratugnum var þar engu að síður mesta mannfjölgun í BNA.  Meðalfjöldi íbúa á hvern ferkílómetra var 2.  Hvítir 94,2%, negrar 0,8% auk 9.426 indíána, 2.806 Kyrrahafseyinga og Asíumanna.  Helztu hópar indíána í fylkinu voru shoshone og arapaho og 25.750 manns voru af spænskum uppruna.

Menntun og menning.  Fyrsti skólinn í Wyoming var stofnaður 1852 í Fort Laramie.  Árið 1869 voru fyrstu fræðslulögin sett og einnig lög um tekjuöflun til reksturs skólakerfisins.  Fjórum árum síðar endurskoðaði þingið fræðslukerfið og samræmdi kennslu í barna- og gagnfræðaskólum.  Í lok níunda áratugar 20. aldar voru grunnskólar 404 með 97.100 nemendur auk 2.500 í einkaskólum.  Þá voru 9 æðri menntastofnanir í landinu með 29.200 stúdenta.  Hinar helztu voru Wyoming-háskóli (1886) í Laramie, Casper-háskóli (1945) í Casper, Austur-Wyoming-háskóli (1948) í Torrington og Sheridan-háskóli (1948) í Sheridan.

Mörg safna landsins sýna list og muni frá dögum forsögulegra frumbyggja og landnámstímanum.  Meðal hinna helztu eru Buffalo Bill sögumiðstöðin í Cody.  Þar er Buffalo Bill-safið og Whitney-listasafnið með vestrænni list.  Þá má einnig nefna Wyoming ríkissafnið í Cheyenne og Wyoming landnemasafnið í Douglas.

Áhugaverðir staðir eru margir og merkilegir.  Hinir helztu eru Yellowstone þjóðgarðurinn og Grand Teton þjóðgarðurinn.  Þar að auki hefur margt varðveitzt frá landnámstímanum.  Nokkur merkileg virki hafa verið endurbyggð, s.s. Fort Laramie National Historic Site í Fort Laramie, Fort Bridger ríkissafnið í Fort Bridger, Fort Fetterman (1867) í Douglas og Fort Caspar í Caspar.  Meðal annarra söguslóða eru Oregon Ruts State Historical Site og Register Cliff State Historic Site, báðar í Guernsey, og Sjálfstæðiskletturinn nærri Caspar.

Íþróttir og afþreying.  Fjöllin, slétturnar, skógarnir, stöðuvötnin og árnar gefa kost á öllum möguleikum til íþrótta og afþreyingar, sem hægt er að hugsa sér (gönguferðir, dýraveiði, útilegur, siglingar, stangveiði, útreiðar, golf og tennis).  Skífuskotfimi er víða æfð og skotfélög (rifflar og skammbyssur) eru vinsæl.  Skíðaíþróttin nýtur vaxandi vinsælda.  Helztu skíðasvæðin eru í Jackson Hole í Teton Village, Snow King Mountain í Jackson og Meadowlark í Worland.  Bændagisting (á stórum búgörðum) og villireiðar (rodeo) njóta vaxandi vinsælda.