Æðsti embættismaður er fylkisstjóri, sem er kosinn í almennum kosningum til 4 ára í senn án nokkurra framboðstakmarkana.  Aðrir helztu embættismenn, sem eru einnig kosnir í almennum kosningum til 4 ára eru:  Varafylkisstjóri, innanríkisráðherra, dómsmálaráðherra, fjármálaráðherra og menntamálaráðherra.

Þingið starfar í öldungadeild (33; 4 ár) og fulltrúadeild (99; 2 ár).  Forseti öldungadeildar og forseti fulltrúadeildar eru kosnir hvor í sinni deild.  Fylkið á tvö sæti í öldungadeild og níu sæti í fulltrúadeild sambandsþingsins í Washington DC og ræður 11 kjörmönnum í forsetakosningum.

Allt frá árinu 1854, þegar einn fyrstu funda lýðveldisflokksins var haldinn í Ripon, fram á sjötta áratug 20. aldar stóð hann við stjórnvölinn í fylkinu.  Robert M. La Follette var fylkisstjóri lýðveldisflokksins á árunum 1901-06 við góðan orðstír fyrir umbótaáætlanir og aðgerðir.  Þá var hann kosinn til setu í öldungadeild sambandsþingsins og árið 1924 var hann forsetaframbjóðandi framfaraflokksins.  Joseph R. McCarthy komst í sviðsljósið vegna harðra viðbragða sinna og krossferðar gegn kommúnistum í BNA, þegar hann sat í öldungadeild sambandsþingisins á sjötta áratugi 20. aldar.  Á síðasta áratugi aldarinnar var Wisconsin tveggja flokka fylki.  Fylgi demókrata byggir aðallega á þéttbýlinu og lýðveldisflokkurinn á meira fylgi í dreifbýlinu.  Kjörmenn fylkisins studdu Franklin D. Roosevelt í þremur kosningum til embættis forseta BNA (1932-1940) en studdu og styðja að öllu jöfnu fremur frambjóðendur lýðveldisflokksins til þessa embættis.  Árið 1992 náðu demókratar meirihluta í þingkosningum.