Virginíu er stjórnað í anda stjórnarskrárinnar frá 1970/1971.  Æðsti embættismaðurinn er fylkisstjóri, sem er kosinn í almennum kosningum til 4 ára í senn og sami frambjóðandinn má ekki þjóna lengur en tvö samfelld kjörtímabil.  Varafylkisstjórinn er einnig kosinn til 4 ára en honum eru ekki sett framboðstakmörk.  Dómsmálaráðherra er einnig kosinn í almennum kosningum en fylkisstjórinn skipar í önnur embætti, s.s. innanríkisráðherra, forseta herráðsins, fjármálaráðherra o.fl.

Þingið starfar í öldungadeild (40; 4 ár) og fulltrúadeild (100; 2 ár).  Það er elzta þing BNA.  Virginía á tvö sæti í öldungadeild og 11 sæti í fulltrúadeild sambandsþingsins í Washington DC og ræður 13 kjörmönnum í forsetakosningum.

Virginíubúar hafa mikil áhrif á stjórnarfar BNA og þau voru einna mest á síðasta hluta 18. og fyrri hluta 19. aldar.  Demókratar voru í forystu frá 1880-1970.  Öldungadeildarþingmaður þeirra í Bandaríkjaþingi, Harry Flood Byrd, sat þar fyrir þeirra hönd frá 1933 til 1965.  Kjörmenn fylkisins hafa oftast stutt frambjóðendur lýðveldisflokksins í forsetakosningum síðan snemma á sjötta áratugi 20. aldar.  Í nóvember 1989 kusu Virginíubúar L. Douglas Wilder fyrsta þeldökka fylkisstjórann í sögu BNA.