Samkvæmt manntalinu 1990 var íbúafjöldinn 1,722.850 og hafði fjöldað um 17,9% næstliðinn áratug.  Meðalfjöldi íbúa á hvern ferkílómetra var 8.  Aðalþéttbýlið var í norðurhlutanum.  Hvítir 93,8%, negrar 0,7% auk 24.093 indíána (navajo, ute, gosiute eða shoshone o.fl.), 6.500 Japanar, 5.322 kínverjar, 2.797 Víetnamar og 2.629 Kóreumenn.  Spænskættað fólk taldi 84.600.

Menntun og menning.  Mormónskir landnemar í Saltavatnsdal stofnuðu fyrsta skólann árið 1847.  Núverandi skólakerfi má rekja aftur til 1895, þegar löggjafinn fól borgar- og bæjarráðum að standa straum af  og reka almenningsskóla.  Skömmu fyrir 1990 voru grunnskólar 718 með 437.400 nemendur auk 10.900 í einkaskólum.  Þá voru æðri menntastofnanir 14 með 114.800 stúdenta.  Meðal hinna helztu þeirra eru:  Utah-háskóli, Tækniháskóli Utah í Salt Lake City (1948), Westminster-háskóli (1875) í SLC, Brigham Young-háskóli (1875) í Provo, Tækniháskóli Utah í Provo (1941), Ríkisháskóli Utah (1888) í Logan, Weber fylkisháskólinn (1889) í Ogden og Suður-Utah ríkisháskólinn (1897) í Cedar City.

Salt Lake City er miðstöð menningar fylkisins.  Þar eru m.a. Hansen stjörnuskoðunarstöðin, Hogle dýragarðurinn, Alþjóðlegi friðargarðurinn, Salt Lake listasafnið (heimalistamenn), Sögufélagssafnið, Náttúrugripa- og listasafn Utah-háskóla, Minningarsafn landnemanna og Kirkjusögu- og listasafnið.  Springville listasafnið er í Springville og lista-, fornminja- og náttúrugripasöfn eru í Provo.

Áhugaverðir staðir eru margir, þ.á.m. Zion þjóðgarðurinn og Bryce-gljúfursþjóðgarðurinn.  Víða eru sögulegir staðir og minjar í tengslum við indíána, mormóna og náttúruundur.  Musteristorgið í Salt Lake City er umkringt Mormónamusterinu, tónlistarhöllinni (Tabernacle) og öðrum byggingum.  Býkúpuhúsið í borginni, byggt 1855, var heimili Brigham Young.  Í Newspaper Rock-ríkisgarðinum eru fornar steinristur indíána.  Novenweep-þjóðarminnismerkið í suðausturhorni fylkisins varðveitir klettabústaði indíána.  Á sögustaðnum Golden Spike National Historic Site er minnst lagningar járnbrautar þvert yfir meginlandið, sem lauk 1869.

Íþróttir og afþreying.  Þjóðarskógar og garðar, fjöll stöðuvötn og vatnsföll gefa kost á margs konar útivist og afþreyingu (tjaldferðir, dýraveiðar, stangveiði, útreiðar, gönguferðir og vetraríþróttir).  Skíðasvæði eru nokkur, s.s. Sundance í Provo, Alta í Alta, Snowbird skíða- og sumardvalarsvæðið í Snowbird og Powder Mountain í Eden.  Bryce-gljúfur, Glen-gljúfur og Zion-þjóðgarðurinn eru vinsæl útivistarsvæði.