Arlington er borg við Þrenningarána (Trinity River) og Arlingtonvatn milli Dallas og Fort Worth.  Hún er miðstöð flutninga og iðnaðar (bílar, flugvélar, landbúnaðarvélar og tæki, plast, rafeindatæki, prentað efni og matvæli).  Þróun iðnaðar tengdum bílasmíði og búnaði til geimferða leiddi til talsverðrar fjölgunar íbúa á níunda áratugi 20. aldar.  Borgin er setur Texasháskóla (1895) og þar er leikvangurinn Ballpark, heimavöllur Texas Rangers (hafnarbolti).  Bærinn var stofnaður árið 1875 og var nefndur eftir Arlington í Virginíufylki.  Eftir að járnbrautin hafði verið lögð inn á þessar slóðir, óx gengi bæjarins vegna baðmullarvinnslu.  Iðnvæðing í stórum stíl hófst upp úr miðri 20. öldinni. Áætlaður íbúafjöldi 1990 var tæplega 262 þúsund.