Heildarflatarmál fylkisins er 109.158 ferkílómetrar (36. í stærðarröð BNA).  Sambandsstjórnin á 5,1% landsins, sem er nokkuð líkt tígli í laginu.  Mestu vegalengdir frá austri til vesturs eru 700 km og frá norðri til suðurs 185 km.  Hæð yfir sjó er frá 54 m meðfram Mississippifljóti til 2.025 m á toppi Clingmans Dome í austurhlutanum.  Meðalhæð yfir sjó er 274 m.

Landinu er skipt í fjórar landfræðilegar einingar:  Bláfjöll, Appalachia-hásléttuna, Miðlágsléttuna og Strandsléttu Mexíkóflóa.

Austasti hluti fylkisins nær inn á Bláfjallasvæðið.  Þar er landið hæst og landslag hrjúfast.  Hæstu tindarnir eru í Unaka-fjöllum meðfram suðausturmörkunum.  Mestur hluti svæðisins er þakinn skóglendi og jarðvegur er þunnur, grýttur, lítið eitt súr og víðast lítt nýtilegur til ræktunar.  Vestast er Dala- og hryggjasvæðið.  Þar eru lágir, samhliða hryggir með breiðum dölum á milli.  Jarðvegurinn þar er nokkuð frjósamur.

Appalachia-hásléttan og Miðlágsléttan eru í miðju fylkinu.  Hin fyrrnefnda, einnig kölluð Cumberland, er prýdd flattypptum fjöllum, skornum mjóum og djúpum dölum.  Jarðvegur er þunnur, sendinn og miðlungsfrjór.  Hin síðarnefnda nær yfir Nashville-lægðina, sem er umkringd hálendisbrúninni.  Hún er öldótt slétta með kringlóttum hæðum, sem eru sumar sérkennilegar í laginu.

Stærsti hluti Vestur-Tennessee er lágöldótt og flatlend Strandslétta Mexíkóflóa.  Þar er jarðvegur víðast sendinn eða miðlungs til mjög frjósamur árframburður.  Vesturmörk hennar eru við Mississippi-fljót.  Þar eru lægðir þaktar frjósömum árframburði, sem eru frábært ræktarland, séu þær ræstar fram.

Næstum allt fylkið er innan Mississippi-lægðarinnar og þangað rennur allt vatn bæði beint og óbeint.  Meðal þveráa Tennessee-árinnar í fylkinu eru Holston, French Broad, Little Tennessee, Clinch, Hiwassee, Duck og Stóra-Sandá.  Helztu árnar, sem eiga upptök á Bláfjallasvæðinu (Cumberland), eru Stones og Harpeth.

Manngerð lón eru ekki færri en 25.  Þeirra á meðal eru Kentucky, Pickwick, Chickamauga, Watts Bar, Douglas, Cherokee og Norris.  Í Bláfjallaánum eru m.a. Barkley, Old Hickory og Cordell Hull.  Reelfoot-vatn í norðvesturhluta fylkisins er stærsta náttúrulega stöðuvatnið.  Það myndaðist í jarðskjálftum á tímatilinu 1811-12.

Loftslagið er temprað með hlýjum, rökum sumrum og svölum vetrum.  Yfirleitt lækkar meðalhiti með hæð yfir sjó.  Meðalárshiti í Nashville og Knoxville er 15,6°C.  Lægsta skráð hitastig er -35,6°C (1917 í Mountain City) og hið hæsta  45°C (1930 í Perryville).

Flóra og fána.  Næstum helmingur landsins er þakinn skógi, að mestu lauftrjám.  Tegundir eru rúmlega 150 og hinar helztu eru:  askur, beyki, álmur, kastanía, hlynur, túlipanaösp (fylkistréð), valhnetutré, sedrusviður, fura og greni.  Meðal algengra blómplantna eru azalea, hornviður, fjallalárviður, iris (fylkisblómið), júdasartré og alparós.

Algengustu villtu dýrin eru svartbirnir, dádýr, pokarottur, refir, kanínur, þefdýr og íkornar.  Nokkrar fuglategundanna eru:  Bláfugl, kráka, orri, haukur, hermikráka (fylkisfuglinn), rauðbrystingur og kalkún.  Margar farfuglategundir ferðast meðfram Mississippi-fljóti.  Einu eitruðu snákarnir í fylkinu eru koparhaus, skröltormur og nokkrar aðrar tegundir.  Veiðifiskar eru helztir;  Bassi, krappi, gedda, urriði og bramafiskur.

Auðlindir, framleiðsla, iönaður.  Námugröftur nemur minna en 1% af vergri þjóðarframleiðslu.  Helztu jarðefnin eru tjörukol, fosfat, eðalsteinar, kalksteinn, marmari, sink, leir, sandur, möl, kopar, silfur, gas og olía.

Landbúnaður nemur 1,5% vergrar þjóðarframleiðslu.  Helztu afurðir eru nautakjöt, mjólkurvörur, svínakjöt, kjúklingar, egg, sojabaunir, tóbak, fóðurvörur, vaðmull, maís, hveiti, sorghum, baunir, tómatar, epli og ferskjur.  Hestarækt er talsverð á Nashville-svæðinu.

Nýting skóga byggist aðallega á hikkorí, gulfuru, rauð- og hvíteik og túlípanaösp.  Framleiðsla timburs, húsgagna og pappírs er mikilvæg fyrir efnahaginn.
Stór og smá stöðuvötn og lón landsins skapa kjöraðstæður til fiskveiði en eru ekki veigamikill þáttur atvinnulífsins.  Talsvert er ræktað af fiski í fylkinu (s.s. urriði).

Iðnaðurinn nemur 24% vergrar þjóðarframleiðslu.  Helztu framleiðsluvörur eru:  Efnavörur, vefnaðarvörur, vélbúnaður til iðnaðar, flutningatæki, matvæli, bílar, rafeindatæki, pappír, prentað efni, ál og frummálmar