Heildarflatarmál fylkisins er 4.002 ferkílómetrar (minnsta fylki BNA).  Sambandsstjórnin á 0,7% landsins.  Fylkið er nokkurn veginn ferhyrnt í lögun, 64 km frá austri til vesturs og 76 km frá norðri til suðurs.  Hæð yfir sjó nær frá sjávarmáli til 247 m á Jerimoth-hæð í norðvesturhlutanum.  Eyjar fylkisins eru u.þ.b. 35, flestar í Narragansett-firði.  Hinar stærstu þeirra eru Rhode Island (Aquidneck), Conanicut-eyja, Prudence-eyja og Block-eyja (New Shoreham).  Strandlengjan er 64 km (618 km ef reiknað er með öllum eyjum og skerjum við lágsævi).

Fylkinu er skipt í tvær landfræðilegar einingar:  Strandláglendið og Austur-Nýja-Englands upplandið.  Bæði svæðin teygjast inn í önnur fylki á Nýja-Englandssvæðinu og jarðvegurinn er fremur ófrjósamur.

Strandlínan er nokkuð óbrotin sandströnd með lágar hæðir og saltmýrar að baki.  Hún er öll mynduð á ísöld með jökulöldum, sem úthafsaldan hefur síðan mótað.  Sendin svæði er einnig víða að finna á eyjum í Narragansett-firði.  Lengra frá hafi er að mestu að finna flatlenda jökulaura.  Stórar lægðir eða ker í landslaginu eru merki um bráðnun stórra ísflykkja, eftir að jöklar tóku að hörfa (Lonsdale og Hammond-tjarnir).  Berggrunnurinn, sem er setmyndun frá ísöld, liggur djúpt undir jökulaurnum.

Austur-Nýja-England upplandið er hæðótt með nokkrum smávötnum.  Berggrunnurinn er myndbreyttur og úr graníti með þunnu yfirborðslagi jökulleir og grettistökum.  Sums staðar hefur veðrun máð jökulsetið brott.

Helztu vatnasviðin eru Providence, Seekonk og Sakonnet, sem renna til Narragansett-fjarðar.  Aðalár þessara vatnasviða eru Blackstone, hunt, Pawtuxet, Pettaquamscutt, Potowomut og Woonasquatucket.  Pawcatuck rennur í Block-eyjarsund.  Stærsta stöðuvatnið er Scituate-lónið, sem varð til handan Kent-stíflunnar í Pawtuxet-ánni.

Loftslagið er mildara í Rhode Island en öðrum fylkjum Nýja-Englands og hitasveiflur minni.  Sjávarnándin dregur úr miklum sumarhita en vetur eru tiltölulega kaldir.  Í Providence er meðalhitinn í janúar -2°C og í júlí 22°C.  Á Block-eyju er meðahitinn -1°C og 21°C.  Lægsta skráða hitastig er -30,6°C (1942 í Kingston) og hið hæsta 40°C (1975 í Providence).  Stundum geisa skaðvænlegir fellibyljir á ströndinni.

Flóra og fána.  Fjöldi trjátegunda í fylkinu er a.m.k. 60.  Hinar mest áberandi eru eik, askur, hikkorí, álmur, hlynur, víðir, ösp, sedrusviður og sykurhlynur.  Skóglendi þekur u.þ.b. 58% landsins.  Fyrir ströndinni er mikill þaragróður.  Blómplöntur eru margar og víða.

Meðal algengra, villtra dýrategunda eru dádýr bifrar, otrar, kanínur, þvottabirnir, þefdýr og íkornar.  Í sjónum er talsvert af sverðfiski, bassa, makríl, lúðu, túnfiski, marglyttu og kræklingi.  Í vötnum og ám þrífast bassi, karfi, gedda og urriði.  Meðal algengra fuglategunda eru bláskjór, ugla, rauðbrystingur, endur, fasani, lynghæna, mávar og kría.

Auðlindir, framleiðsla, iðnaður.  Meðal nýtilegra jarðefna eru kalk, granít, sandur, möl og eðalsteinar.  Landbúnaðurinn er fremur rýr og afurðirnar eru aðallega ræktaðar í gróðurhúsum og mjólkurvörur, egg, kartöflur, hey, epli, nautakjöt, svínakjöt og kjúklingar.

Skóganýting er ekki mikil en fiskveiðar eru mikilvægur atvinnuvegur (lúða, humar, kræklingur, smokkfiskur, hörpudiskur, túnfiskur, þorskur, ufsi, síld o.fl.).

Iðnaður stendur undir u.þ.b. 21% vergrar þjóðarframleiðslu.  Helztu framleiðsluvörur eru málmar, nákvæmnistæki, fatnaður, vefnaðarvörur, prentað mál, plastvörur, vélbúnaður til iðnaðar, rafeindatæki, flutningatæki, efnavörur og matvæli.