Samkvæmt manntalinu 1990 voru íbúar fylkisins 1.515.069 og hafði fjölgað um 16,3% næstliðinn áratug.  Meðalfjöldi íbúa á hvern ferkílómetra var 5.  Hvítir 75,6%, negrar 2% auk 134.100 indíána (9%; pueblo, navajo, apache o.fl.; margir á verndarsvæðum).  Alls voru 579.200 (38%) af spænskum uppruna.  Margir íbúanna eru tvítyngdir (enska + spænska).

Menntun og menning.  Strjálbýli og tvö tungumál gerðu íbúunum erfitt fyrir á ýmsa vegu, s.s. við uppbyggingu menntakerfisins.  Konunstilskipun frá 1721 kvað á um stofnun og þróun þess en allt fram á sjöunda áratug 19. aldar varð ekkert úr framkvæmdum.  Þá var fyrsti ríkisskólinn stofnaður og ekki er hægt að tala um skipulagt menntakerfi fyrr en árið 1891.  Í kringum 1990 voru grunnskólar 658 með 296.100 nemendur auk 16.900 í einkaskólum.  Þá voru æðri menntastofnanir 26 með 81.350 stúdenta.  Helztar þeirra voru Ríkisháskólinn (1888) í Las Cruces, Highland-háskóli Nýja-Mexíkó (1893) í Las Vegas, Vestur-Nýja-Mexíkóháskóli (1893) í Silver City og Nýja-Mexíkóháskóli (1889) í Albuquerque.

Helztu söfn landsins eru Þjóðminjasafnið og indíánalistasafnið í Santa Fe og Listasafn ríkisháskólans, Maxwell mannfræðisafnið og National Atomic-safnið í Albuquerque.  Einnig eru áhugaverð söfn í Roswell (Listamiðstöð) og í Alamogordo (Geimfrægðarsafnið).
Áhugaverðir staðir.  Margir sögustaðir eru helgaði menningararfi indíána og spænskra landnema.  Acoma Pueblo er líklega elzta byggðin með stöðuga búsetu í BNA.  Landstjórahöllin, sem Spánverjar byggðu í Santa Fe, er elzta opinbera byggingin í BNA og í trúboðsstöðinni San Miguel í Santa Fe er einhver elzta varðveitta kirkja í landinu.  Meðal annarra búsvæða indíána eru Taos Pueblo, Aztekaþjóðarminnismerkið, Chaco menningar- og sögugarðurinn og Gila-þjóðarminnismerkið með kletta- eða hellabústöðum.  Carlsbad-hellaþjóðgarðurinn í grennd við Carlsbad er meðal náttúruundra landsins og El Morro þjóðarminnismerkið með klettaristum í nágrenni Grants.  Þá er Bandelier þjóðarminnismerkið í grennd við Santa Fe.

Íþróttir og afþreying.  Stórir þjóðarskógar og fjöll, fallegir árdalir og stöðuvötn gera fylkið eftirsótt til dýraveiða, stangveiði, bátsferða, gönguferða og útilegu.  Mörg skíðasvæði eru einnig vinsæl.