Great Falls er borg nærri fossum Missouri-árinnar, sem eru virkjaðir, í Montanafylki.  Hún er miðstöð verzlunar og landbúnaðarhéraðsins umhverfis.  Þar er m.a. framleitt hveiti og hreinsuð olía.  Herstöð flughersins , Malmstrom, er líka mikilvæg tekjulind.  Talsvert margir indíánar búa í þessari borg.  Í nágrenninu er Lewis og Clark-þjóðarskógurinn og Risalindir (Giant Springs), einhverjar mestu vatnslindir heims.  Leiðangur Lewis og Clark (1804-1806) varð að flytja báta sína á höndum upp fyrir fossana ári 1805. 

Byggðin var skipulögð árið 1882 og fimm árum síðar var lögð þangað járnbraut.  Árið 1891 var fyrsta vatnsorkuverið í Montanafylki byggt í grennd bæjarins og samtímis stór koparbræðsla og hreinsunarverksmiðja.  Áætlaður íbúafjöldi árið 1990 var rúmlega 55 þúsund.