Heildarflatarmál fylkisins er 180.546 ferkílómetrar (21. í stærðarröð BNA).  Sambandsstjórnin á 4,6% landsins.  Fylkið er nokkurn veginn ferhyrnt í laginu.  Mestu vegalengdir frá norðri til suðurs eru 460 km og frá 490 km austri til vesturs.  Hæð yfir sjó er á bilinu 70 m við St Francisána í suðausturhlutanum til 540 m á toppi Taum Sauk-fjalls tæplega 160 km norðar.  Meðalhæð yfir sjó er 244 m.

Missouri er skipt í fjórar landfræðileg svæði:  Ozarksléttuna, Osage-slétturnar, giljóttu rætkunarslétturnar og aura Mississippifljótsins.  Landslag Missouri er fjölbreyttara en í öðrum Miðvesturfylkjum.  Stærsta sérsvæðið er Ozarksléttan (stundum kölluð Ozarkfjöll eða Ozarks), sem nær yfir mestan hluta suðurhlutans.  Það er mjög  vatnsveðrað kalksteins- og setlagasvæði.  Við fyrstu sýn virðist það hæðótt en er skorið djúpum árdölum með flötum sléttum á milli.  Hrjúfasti hluti þessa svæðis er St Francois-fjöll í suðausturhlutanum.  Þau eru úr graníti og lausari jarðefni hafa veðrast ofan af þeim.  Kalkberggrunnurinn veðrast auðveldlega og margir hellar hafa myndast þar.  Þúsundir linda spretta upp í þeim.  Jarðvegur Ozarksléttunnar er víðast þunnur og grýttur.

Osage-slétturnar liggja meðfram vesturlandamærunum með aflíðandi halla.  Jarðvegur þeirra er miðlungsfrjósamur og þykkur.  Norðan Missouriárinnar er Skorna ræktunarlandið.  Ísaldarjöklar skildu eftir þykkt lag af seti og sandi.  Árnar veðruðu yfirborðið smám saman og mynduðu hæðótt landslag.  Suðaustasti hluti fylkisins nær inn á aura Mississippifljótsins.  Þar er afrennslislítið láglendi, þakið sand, möl og seti.  Mestur hluti þessa fyrrum mýrlendis hefur verið ræst fram.

Helztu vatnsföllin eru Mississippi og Missouri.  Auk þeirra má nefna Grand, Chariton, Osage, Gasconade og Meramec.  Hvergi eru stór stöðuvötn.  Ozarkslónið í Osage-ánni er manngert eins og Table Rock, Bull Shoals og Wappapello.  Manngerðir skurðir á Mississippiaurunum eru mörg hundruð kílómetra langir.

Loftslagið.  Víðast ríkir rakt og temprað meginlandsloftslag í fylkinu.  Vetur er kaldir með hlýrri skeiðum og sumur heit með þurrari og svalari dögum.  Meðalárshitinn er 12,2°C í norðurhlutanum og 15,6°C í suðausturhlutanum.  Lægsti skráða hitastig er -40°C (1905) og hið hæsta 47,8°C (1954).  Fellibyljahætta er alls staðar í fylkinu, einkum á vorin.

Flóra og fána.  Skóglendi þakti u.þ.b. þriðjung Missouri en nú aðeins 28%.  Stærstu skógarnir eru á Ozarksléttunni og í árdölum (eik, hikkorí, valhneta, álmur, fura, sedrusviður, tupelo, og kýpressa).  Mesta blómaskrúðið er á Ozarksléttunni.  Meðal villtra dýra eru dádýr, sléttuhundar, refir, pokarottur, moskrottur, þvottabirnir og bifrar.  Meðal fuglategunda eru rauðbrystingur, þrestir, uglur og haukar.  Í vötnum og ám eru bassi, karfi, krappi, urriði og sólfiskur.

Auðlindir, framleiðsla og iðnaður.  Afrakstur námuvinnslu nær ekki 1% af vergri þjóðarframleiðslu.  Talsverðar birgðir af lágæðakolum eru í jörðu og þar að auki blý, sink, járngrýti, kalksteinn, marmari, granít, leir, sandur, möl, berít, kopar, olía og silfur.

Landbúnaður nemur 2% af vergri þjóðarframleiðslu.  Mikið er ræktað af nautgripum og mjólkurkúm, svínum og alifuglum.  Helztu uppskeruafurðir eru sojabaunir, maís, hey, hveiti, baðmull, hrísgrjón og grænmeti.

Timburvinnslan er mest á Ozarksléttunni (eik, valhneta, hikkorí og rauður sedrusviður).  Furan er aðalvinnslutegundin.

Iðnaðurinn nemur u.þ.b. 23% af vergri þjóðarframleiðslu.  Helztu framleiðsluvörur eru flutningatæki (bílar og geimferðatæki), málmar, prentað mál, matvæli og efnavara.