Kansas City er meðal mikilvægustu markaðs- og dreifingarmiðstöðva BNA, nokkurn veginn í miðju hinna samliggjandi fylkja á meginlandinu.  Þar er geysigóð aðstaða til flutninga og geymslu korns og annarra afurða.  Iðnaðurinn byggist helzt á framleiðslu matvæla, málma, farartækja, flutningatækja, vélbúnaðar til iðnaðar, málmvöru, efnavöru, glervöru og prentun kveðjukorta.  Meðal æðri menntastofnana borgarinnar eru Missouri-háskóli (1929),

Avila-háskóli (1916), Rockhurst-háskóli (1910), Calvary-biblíuháskólinn (1932) og Listaháskóli borgarinnar (1885).  Markverð söfn eru m.a. Nelson-Atkins-listasafnið (austurlenzk list; svartlist frá Mið-Ameríku).  Aðstaða til íþrótta og afþreyingar er góð, s.s. H.R. Bartle sýningarhöllin og Dýragarðurinn og Starlight-leikhúsið.  Royal-leikvangurinn er heimavöllur Kansas City Royals hafnarboltaliðsins og Arrowhead-leikvangurinn, heimavöllur Kansas City Chiefs ruðningsboltaliðsins.  Þessir leikvangar eru hlið við hlið og mynda saman Harry S. Truman íþróttamiðstöðina.  Árlega er haldin hátíð, sem heitir American Royal Livestock með hestasýningu og ótemjureiðum.

Árið 1821 höfðu fyrstu hvítu landnemarnir komið sér fyrir á þessu svæði.  Þar var á ferð hópur skinnakaupmanna undir forystu franska landkönnuðarina Fran­­­cois Chouteau.  Þessi byggð, sem gekk undir nafninu Westport Landing­, óx sem hafnarbær við ána og krossgötur á Santa Fe- og Oregon-leiðunum.  Árið 1850 fékk hún kaupstaðarréttindi sem Kansasbær og var síðar (1889) skírð Kansas City.  Byggðin blómstraði sem birgðastöð fyrir gullgrafara og landnema á vesturleið.  Fyrsta járnbrautin, sem tengdi Kansasbæ og St Louis, var komin á laggirnar árið 1865.  Eftir aldamótin þróaðist margs konar atvinnustarfsemi í borginni og laðaði að sér marga innflytjendur.  Milli 1910 og 1960 fjölgaði íbúunum úr 248.381 í 475.539.  Árið 1951 kom afturkippur í vöxt borgarinnar, þegar Kansasáin flæddi yfir bakka sína og hluti verksmiðjanna og réttanna fyrir kvikfé í borginni eyðilagðist.  Áætlaður íbúafjöldi árið 1990 var rúmlega 435 þúsund.