|
Heildarflatarmál Mississippi er 125.443
ferkílómetrar (32. í stærðarröð fylkja BNA).
Sambandsstjórnin á 5,5% landsins. Fylkið lítur út eins og
grófur rétthyrningur á kortinu og mestu vegalengdir frá
norðri til suðurs eru 530 km og 290 km frá austri til
vesturs. Landið nær frá sjávarmáli við Mexíkóflóa upp í 246
m á toppi Woodallfjalls í norðausturhlutanum. Meðalhæð yfir
sjó er nálægt 91m. Strandlengjan er 71 km.
Mestur hluti fylkisins er Austurstrandslétta Mexíkóflóa og
hinn hlutinn er árósar Mississippi-fljótsins. Sléttan er
víðast lághæðótt, líkt og Furuhæðir sunnantil og
Miðnorðurhæðirnar. Pontotoc- og Fall Line-hæðirnar í
norðausturhlutanum eru hærri. Vestantil er gulbrúnn
ársetsjarðvegur og dökkur og frjósamur í Svarta beltinu í
norðausturhlutanum. Standlengjan er skorin nokkrum stórum
flóum við St Louis, Biloxi og Pascagoula og er aðskilin frá
Mexíkóflóa með langri eyjakeðju og grunnu Mississippisundinu.
Helztar þessara eyja eru Petit Bois, Horn, Ship og Cat.
Árósar Mississippi eru mjóir sunnantil en breikka norðan
Vicksburg. Þeir eru þaktir þykku og frjósömu árseti, sem
hefur myndazt við mismunandi stór flóð í fljótinu.
Mississippifljótið er mikilvægasta vatnsfall fylkisins.
Aðalþverár þess eru Yazoo og Big Black. Árnar, sem streyma
til suðurs taka til sín mestan hluta alls afrennslis í mið-
og austurhlutum landsins. Meðal þessara vatnsfalla eru
Perluá, Pascagoula og Tombigbee.
Fjöldi stöðuvatna er í fylkinu. Hin stærstu eru manngerð
lón, sem hafa myndast vegna stíflna og varnargarða, s.s.
Ross Barnett-lónið í Perluá, Akrabutla í Kaldá, Grenada í
Yalobusha og Pickwick, þar sem íbjúg vötn hafa myndast í
gömlum árfarvegum.
Loftslagið er heitt og rakt með löngum sumrum og stuttum og
mildum vetrum. Meðalhitinn í júlí er 28°C og 9°C í janúar.
Hitasveiflur eru litlar á sumrin en á veturna er mun heitara
við Mississippisundið en annars staðar í fylkinu. Lægsti
skráður hiti er -28,3°C (1966 í Corinth í norðausturhlutanum)
og 46,1°C (1930 í Holly Springs í norðurhlutanum).
Fellibyljir geisa stundum síðsumars og á haustin. Þeir koma
úr suðurátt frá Mexíkóflóa. Hvirfilbyljahætta er einnig á
tímabilinu febrúar til maí (tornado).
Flóra og fána. Skógar þekja u.þ.b. 55% landsins. Í
norðurhlutanum eru harðviðartegundir (álmur, hikkorí og eik
auk sedrusviðar, furu og tupelo). Í suðurhlutanum er mest
um furu (loblolly, longleaf og slash). Þar að auki vaxa
magnólíur, pekantré og gúmmítré. Fjöldi fallegra
blómategunda prýða landslagið (azalea, svarteygða súsan,
kamelíur, iris, cherokee rós, trillium og fjólur).
Mest ber á dádýrum en einnig er talsvert um bifra, refi,
pokarottur, kanínur, þefdýr og íkorna. Meðal algengra
fuglategunda eru endur, gæsir, lynghænur og kalkúnar. Mikið
erum tegundir, sem hafa vetursetu (endur, egret, hegrar og
kríur). Í ferskvatni eru svartbassar, brími, steinbítur og
karfi, en krabbar, ostrur, rækjur, makríll, síld og tarpon í
sjó.
Auðlindir, framleiðsla og iðnaður. Mississippi á talsverðar
birgðir af olíu og gasi í jörðu og þar að aluki leir, sand,
möl, surtarbrand, járngrýti, Kalkstein og salt.
Landbúnaður stendur undir u.þ.b. 3% af vergri
þjóðarframleiðslu. Hann er í þriðja sæti BNA í framleiðslu
baðmullar. Verðmætasta afurðin er sojabaunir. Einnig er
ræktað talsvert af hrísgrjónum, heyi, hveiti, maís, sætum
kartöflum, pekanhnetum og kvikfé.
Fylkið er talið meðal fremstu framleiðenda trjávöru í BNA (fura,
harðviður, trjákvoða og pappír).
Fiskveiðar byggjast aðallega á síld (menhaden) og rækjum.
Iðnaðurinn stendur undir 28% vergrar þjóðarframleiðslu.
Helztu framleiðsluvörur eru flutningatæki (skipasmíði),
fatnaður og vefnaðarvara, timbur, húsgögn og aðrar trévörur,
elektrónísk tæki, unnin matvæli, hlutir og tæki til
geimferða og bifreiðahlutar. Landbúnaðarafurðir eru helztar
kjöt, kjúklingar, ostar og einnig er talsvert um niðursuðu
og frystingu sjávarafurða. |
