Heildarflatarmál Louisiana er 134.275
ferkílómetrar (31 í stærðarröð fylkja BNA).
Sambandsstjórnin á 4,2% landsins. Fylkið er líkt L í laginu,
430 km frá norðri til suðurs og 460 km frá austri til
vesturs. Hæð yfir sjó er frá 2,4 m neðan sjávarmáls í New
Orleans til 163 m á Driskill Mountain í norðurhlutanum.
Meðalhæð yfir sjó er 30m. Strandlengjan við Mexíkóflóa er
639 km löng.
Landinu er skipt í þrjú láglendissvæði:
Vesturflóastrandsléttuna, óshólma Mississippi og
Austurflóastrandsléttuna. Fyrstnefnda svæðið nær yfir
næstum allan vesturhluta fylkisins. Sléttunni hallar
aflíðandi suður að Mexíkóflóa og landslagið einkennist af
sandhryggjum (barrier beaches). Innar er mýrlent belti með
fjölda salthæða. Aðrir landshlutar eru sléttur með ávölum
hæðum og öldum, sem hvíla á leir- og sandblönduðum
moldarsetlögum.
Keðja lágra hæðahryggja liggur meðfram Mississippifljótinu á
óshólmasvæðinu. Þeim hallar aflíðandi frá fljótinu og slík
svæði eru nefnd bakland. Óshólmasvæðið er gríðarstórt,
38.350 ferkílómetrar. Það myndaðist og er enn að myndast af
árframburði og er þakið frjósömum jarðvegi.
Austurflóasléttan nær yfir tiltölulega lítið svæði norðan
Pontchartrain-vatns og mýrlendisins. Norðar taka við
öldóttar sléttur.
Mississippifljótið og þverár þess, Red, Ouachita og
Atchafalaya, hafa borið fram hvílíkt magn jarðefna, að
farvegir þeirra eru nú hærri en aðliggjandi svæði.
Varnargarðarnir meðfram þessum ám eru u.þ.b. 3.220 km langir
og stöðugt verður að hækka þá, því árnar hlaða æ meir undir
sig. Víða eru flóðagáttir, þar sem hægt er að hleypa vatni
öruggar leiðir til að draga úr hættu neðar með ánum. Árnar
Black, Pearl og Sabine eru einnig hluti af vatnasviði
fylkisins.
Pontchartrain-vatn er ísalt og telst vera stærsta stöðuvatn
fylkisins. Íbjúg stöðuvötn eru víða í gömlum árfarvegum.
Loftslagið er rakt og heittemprað með heitum sumrum og
mildum vetrum. Meðalárshitinn er á bilinu 18,3°C í
norðurhlutanum til 20,6°C syðst. Miklum sumarhita og raka
fylgir tíð úrkoma. Lægsta skráð hitasti er -26,71C (1899)
og hið hæsta 45,6°C (1936). Fellibyljir eru tíðir síðsumars
og á haustin.
Flóra og fána. Fylkið er auðugt af plöntu- og dýrategundum.
Skóglendið, sem þekur u.þ.b. helming landsins, er nýtt að
hluta (eik, fura, kýpressa). Víða eru skrautleg villiblóm
(azalea, magnólía, kamella, liljur og brönugrös).
Í skógunum þrífast minkar, þvottabirnir, pokarottur og
þefdýr og í fenjaskógum eru villikettir. Amerískir
krókódílar synda um fenin og árósana. Fuglalífið er mjög
fjölbreytt. Ýmsar anda- og gæsategundir dvelja vetrarlangt
í suðurhluta landsins, þar sem brúni pelikaninn hefst líka
við. Mikið er af fiski, bassi, sólfiskur og karfi í
ferskvatni.
Auðlindir, framleiðsla og iðnaður. Fylkið er auðugt af
jarðefnum. Olía og náttúrugas eru veitamest fyrir
efnahaginn. Mikið er framleitt af salti og brennisteini.
Talsverðar birgðir eru af kalksteini, sandi, grjóti, möl og
leir.
Helztu landbúnaðarafurðir eru baðmull, sojabaunir, hrísgrjón,
sykurreyr, hey, sætar kartöflur, maís, sorghum og grænmeti.
Timburvinnsla og skógrækt eru mikilvæg atvinnugrein. Helztu
nytjategundir trjáa eru eik, askur, kýpressur, gúmmítré,
baðmullarösp og víðir. Louisiana er meðal fremstu fylkja í
framleiðslu borðviðar.
Veiði í vötnum með ströndinni og inni í landi er mikil.
Fiskveiðar ná samt ekki að standa undir heilu prósenti af
vergri þjóðarframleiðslu. Ársaflinn er engu að síður hinn
mesti meðal fylkja BNA, nema Alaska. Rúmlega þriðjungur
aflans er síldartegund. Rækja er verðmætasti aflinn auk
ostra og blákrabba.
Helztu framleiðsluvörur fylkisins eru efnavörur,
flutningatæki, eldsneyti, kol, pappír, matvæli og málmar. |