Louisville, höfuðborg Kentucky-fylkis, er miðstöð efnahagsmála stórborgarsvæðis, sem nær yfir Ohio-ána og inn í Indiana-fylki, með geysifjölbreyttum iðnaði (búsáhöld, landbúnaðartæki, vörubílar, bílahlutir, matvæli, tóbaksvörur, málning, gúmmí og amerískt viskí (bourbon), sem er einkenndandi fyrir fylkið.  Þarna eru líka framleiddar „Louisville Slugger”-hafnarboltakylfur.  Þarna fara fram Kentucky-veðreiðarnar í maí ár hvert (síðan 1875) á Churchill Downs-skeiðvellinum.  Kentucky-kaupstefnan er annar árlegur viðburður.  Meðal skoðunarverðra staða eru J.B. Speed-listasafnið og Sögu- og vísindasafnið.  Farmington er fallegt Suðurríkjaheimili (1808-10) í grenndinni og Fort Knox er líka nærri.  Meðal æðri menntastofnana borgarinnar eru Louisville-háskólinn (1798), Spalding-háskólinn (1814), Guðfræðiskóli öldungakirkjunnar (1853) og Guðfræðiskóli baptista (1858).

Borgin stendur á svæði, þar sem Shawnee-indíánar bjuggu áður.  Byggðin var stofnuð árið 1778 (George Rogers Clark) og er meðal elztu byggða vestan Appalachia-fjalla.  Fyrsta byggðin var á Corn-eyju í Ohio-fljóti en hún var flutt á núverandi stað árið 1779 og næsta ár var hún nefnd eftir Lúðvík 14. Frakkakonungi í þakklætisskyni vegna aðstoðar Frakka í frelsisstríðinu gegn Bretum.  Á 19. öldinni var bærinn í fararbroddi í viðskiptalífinu og þróunar í Suð- og Miðvesturríkjunum eftir að grafinn var skipaskurður fram hjá fossunum í ánni.  Á sjötta áratugi 19. aldar tengdist borgin járnbrautunum.  Iðnvæðingin jókst og mikil uppbygging átti sér stað eftir síðari heimsstyrjöldina, einkum á sjöunda og áttunda áratugnum.  Áætlaður íbúafjöldi árið 1990 var tæplega 270 þúsund.