Lexington (Lexington-Fayette) er borg í miðju blágresissvæðinu, þar sem mest er ræktað af kappreiðahestum.  Borgin er mikilvæg miðstöð viðskipta, iðnaðar og menntunar og þar er stór tóbaksmarkaður.  Þarna eru framleidd skrifstofuáhöld, raf- og rafeindatæki, pappírsvörur, farartæki og matvæli.  Ferðaþjónusta er mikilvæg og hestaræktin laðar til sín mikinn fjölda gesta ár hvert.  Þarna eru líka áhugaverðir staðir eins og Ashland, heimili þingmannsins Henry Clay, Hopemont (1814), heimili Suðurríkjahershöfðingjans Juhn Hunt Morgan og dýrafræðingsins Thomas Hund Morgan, Waveland, þar sem er nú safn með húsgögnum og heimili Mary Todd Lincoln, eiginkonu Abrahams Lincoln, forseta BNA.  Kentucky-háskóli og Guðfræðiháskólinn (1865) eru líka í borginni.

Árið 1775 ákváðu landnemar á þessu svæði að skíra það eftir átökum í frelsisstríðinu í Massachusetts.  Byggðin var stofnuð 1779 og fyrsta þing Kentucky-fylkis kom þar saman árið 1792.  Snemma á 19. öldinni var Lexington orðin miðstöð viðskipta og menningar og eftir 1870 varð tóbakið mikilvæg verzlunarvara.  Eftir síðari heimsstyrjöldina jókst iðnvæðingin stöðugt.  Áætlaður íbúafjöldi árið 1990 var rúmlega 204 þúsund.