Lawrence er borg í frjósömu kornræktarhéraði.  Þar eru Kansasháskóli og Haskell menntaskólinn fyrir indíána (1884).  Iðnaðurinn byggist aðallega á framleiðslu heillaóskakorta, gæludýrafóðurs, efnavöru og pípuorgela.  Þarna var stofnað til byggðar árið 1854, þegar hjálparstofnun í Nýja-Englandi, sem barðist gegn þrælahaldi, sendi þangað landnema.  Byggðin fékk nafn Amos A. Lawrende, sem framleiddi vefnaðarvöru í Nýja-Englandi.  Byggðin komst á spjöld sögunnar vegna aðgerða gegn þrælahaldi eftir 1850.  Í borgarastyrjöldinni lagði her William Quantrill frá Suðurríkjunum bæinn í eyði árið 1863.  Lagning járnbrautanna hleypti nýju lífi í bæinn 1864 og þar var stofnaður háskóli 1865.  Áætlaður íbúafjöldi árið 1990 var tæplega 66 þúsund.