Meginlandsloftslag ríkir í Kansas.  Vetur eru kaldir og sumur heit.  Lítill munur er á því milli landshluta vegna þess, hve landslagslínur eru jafnar og trufla lítt loftflæðið.  Meðalárshiti er 13,3°C.  Lægsta skráða hitastig er -40°C (1905) og hið hæsta 49,4°C (1936).  Þurrkar verða á nokkurra ára fresti, mestir í vesturhlutanum.  Þrumuveður eru algeng, sundum með hagli.  Farvegir fellibylja liggja um Austur-Kansas.  Meðalsnjókoma er 381mm.

Flóra og fána.  Víða er graslent og villijurtir blómstra á vorin (sólblóm o.fl.).  Kaktus og sverðliljur vaxa á þurrustu svæðunum í vestry.  Skógar þekja aðeins 1,3% landsins.  Helztu trjátegundirnar eru eik, hikkorí, álmur, baðmullarösp og víðir.

Fram undir miðja 20. öldina reikuðu stórar hjarðir vísunda og antilópna um grassléttur landsins.  Nú ber mest á dádýrum, sléttuúlfum, sléttuhundum og kanínum.  Meðal áberandi fuglategunda eru sléttuhænsn, lynghænur, engjalævirkjar, haukar og svartþrestir.  Í ám og lónum eru bassi, karfi, sólfiskur og krappi.

Auðlindir, framleiðsla og iðnaður.  Mikilvægustu náttúruauðlindir fylkisins eru olía, náttúrugas, kol, sandur og möl.  Kansar er meðal mestu hveiti- og maísframleiðslufylkja BNA.  Einnig er mikið ræktað af alfalfa, sorghum, sojabaunum, rúg, höfrum, byggi og sólblómum.  Nokkuð er um mjólkurframleiðslu, kjúklinga- og svínabú.

Skóglendi eru takmörkuð og skapa litlar tekjur.  Eitthvað er notað af eik, valhnetu og hikkorí til húsgagnasmíði.  Iðnaðurinn byggist aðallega á smíði flutningatækja, einkum flugvéla, framleiðslu vélbúnaðar til iðnaðar, matvæla, prentvöru, efnavöru, gúmmís og plastvöru.