Samkvæmt manntalinu 1990 voru íbúarnir 2.776.755 og
hafði fækkað um 4,7% næstliðinn áratug. Meðalfjöldi íbúa á hvern
ferkílómetra var 19. Hvítir 96,6%, negrar 1,7% auk 7.217 indíána,
4.618 Kóreumanna, 4.442 kínverja, 3.374 frá Laos, 3.021 indverja og
2.882 Víetnama. Fólk af spænskum uppruna var 32.650.
Menntun og menning. Fyrsti ríkisskólinn tók til starfa 1830
skólakerfi landsins var farið að virka fjórum árum síðar. Skömmu
fyrir 1990 voru grunnskólar 1.607 með 478.500 nemendur auk 41.900 í
einkaskólum. Þá voru æðri menntastofnanir 58 með 169.900 stúdenta.
Meðal hinna helztu eru Iowa-háskóli í Iowa City, Vísinda- og
tækniháskóli Iowa (1858) í Des Moines og Grinnell-háskóli (1846) í
Grinnell.
Söfn, bókasöfn og hljómsveitir eru í helztu borgunum. Þeirra á meðal
eru Listamiðstöð Des Moines, Davenport listasafnið og Putnam-safnið í
Davenport, Sioux borgarsafnið, Sanford stjörnuathugunarstöðin og
safnið í Cherokee og Grout-sögu- og vísindasafnið í Waterloo.
Áhugaverðir staðir. Effigy Mounds þjóðarminnismerkið og gullfallegt
landslag við Okoboji- og Spirit-vötnin í norðvesturhlutanum eru
langvinsælustu ferðamannastaðirnir. Margir elta líka uppi sögustaði
tengda frumbyggjunum, landnáminu og merku fólki. Herbert Hoover
þjóðarminnismerkið í West Branch nær yfir fæðingarstað og æskuheimili
31. forseta BNA. Amananýlendurnar og fólkið, sem býr þar norðvestan
Iowa City, heldur enn þá við gömlum hefðum þýzku forfeðranna og
búskaparháttum. Fort Atkinson þjóðarminnismerkið er helgað fyrstu
landnemunum. Dvorák-minnismerki í Spillville er helgað tékkneska
tónskáldinu Antonín Dvorák, sem bjó þar skamma hríð árið 1893.
Íþróttir og afþreying. Iowa státar af mörgum útivistarstöðum, þar sem
er hægt að stunda dýraveiðar, stangveiði, útilegur og siglingar.
Skíðasvæðin eru í Dubuque og Estherville. |