Boise er höfuðborg Idaho-fylkis.  Efnahagur hennar byggist á opinberri stjórnsýslu, bankastarfsemi, heilbrigðisþjónustu og viðskiptum.  Talsvert er framleitt af timburvöru, matvælum og elektrónískum tækjum.  Meðal skoðunarverðra staða er þinghúsið (1906-12), guðshús gyðinga (Congregation Beth Israel; 1895), elzta sýnagóga vestan Mississippifljótsins og hana sækja enn þá afkomendur upprunalegs safnaðar og Baskasafnið og menningarmiðstöðin, sem varðveitir minjar um menningaráhrif innflytjenda frá NV-Spáni rétt fyrir aldamótin 1900.  Boise ríkisháskólinn var stofnaður 1932.

Hinn mikli fjöldi Shoshone-ættkvísla, sem bjó á þessu svæði snemma á 19. öldinni, gerði tilraunir fransk-kanadískra loðdýraveiðimanna til búsetu að engu og hvítum mönnum tókst ekki að koma sér þarna fyrir fyrr en árið 1863, þegar gull fannst á svæðinu.  Þá byggði Bandaríkjaher virkið Boise og borginni var valinn staður.  Hún var á krossgötum Oregon-leiðarinnar og leiðanna til gullnámanna og óx hratt.  Kínverskir innflytjendur komu til að leita að gulli og þeir voru orðnir fleiri en hvítu gullgrafararnir árið 1870.  Síðar tóku kínverjarnir upp búskap, viðskipti og rekstur veitingahúsa.  Árið 1864 varð Coise höfuðborg Idaho-héraðs og árið 1890, þegar héraðið varð að fylki, var Boise áfram setur stjórnar þess.  Gerð stíflu og orkuvers samkvæmt lögum frá 1902 og lega borgarinnar á járnbrautaleiðinni til Kyrrahafsstrandar (1925) jók enn á vöxt og viðgang borgarinnar.  Nafnið Boise er úr frönsku, boisé, sem þýðir skógi vaxinn.  Loðdýraveiðimennirnir, sem gátu ekki setzt að snemma á 19. öldinni notuðu það vegna skóganna meðfram Boise-ánni.  Áætlaður íbúafjöldi árið 1990 var tæplega 126 þúsund.