Kauai er eyja í norðvestanverðri Hawaii-eyjakeðjunni, norðvestan Oahu.  Milli þessara eyja er Kaui-sund og sundið milli Kauai og Niihau er Kaulakahi-sund.  Kauai er fjórða stærsta eyjan og er stundum kölluð Garðey.  Hún myndaðist við eldgos og er þakin eldfjöllum og gígum.  Hæsti tindurinn er Kawaikini (1.599m).  Heildarflatarmál eyjarinnar er 1431 ferkílómetrar.  Jarðvegurinn, einkum norðantil á eyjunni, er frjósamur og talsvert er ræktað af sykurreyr og hitabeltisávöxtum.  Eyjan er sundurskorin af giljum og gljúfrum.  Stærsta gljúfrið er Waimea, tæplega 16 km langt og rúmlega 800 m djúpt.  Aðalbyggðirnar eru Lihue og Kapaa.  Áætlaður íbúafjöldi árið 1990 var 50.900.