Tampa er stór hafnarborg, sem þjónar stóru héraði, þar sem eru ræktaðir nautgripir, sítrusávextir, grænmeti og framleitt fosfat.  Hún er einnig miðstöð viðskipta, fjármála og þjónustu og er meðal stærstu iðnaðarborga Flórída (matvæli, elektrónískir hlutir, prentun, samgöngutæki og byggingarefni).  Stór rækjuveiðifloti á heimahöfn í Tampa.  Loftslagið er jaðartrópískt og laðar til sín fjölda vetrargesta og margir eftirlaunaþegar hafa setzt þar að.  Í og við borgina er fjöldi baðstranda og skemmtigarða.  Skammt utan borgarinnar er alþjóðaflugvöllur og hún er setur Tampaháskóla (1931), menntaskóla (1890) og Suður-Flórídaháskóla (1956).  Meðal áhugaverðra staða er Ybor City (1885), fallegt, latneskt hverfi, þar sem var vindlaiðnaður.  Tampa státar af nokkrum leikhúsum og söfnum.  Gestir hafa gaman að heimsókn í Busch Gardens og þarna er líka Tampa Bay-leikvangurinn, aðsetur Tampa Bay Buccaneers (ruðningsboltalið).

Spænski hermaðurinn Pánfilo de Narváez kannaði Tampaflóa 1528.  Landnám þar hófst ekki fyrr en árið 1823, þegar komið var á fót plantekru.  Brooke-virkið var byggt árið eftir.  Uppgötvun fosfats árið 1883, lagning járnbrautar 1885 og stofnun vindlaiðnaðarins 1886 efldi vöxt og viðgang byggðarinnar.  Í Spænsk-ameríska stríðinu var borgin þjálfunarmiðstöð fyrir herinn og þaðan héldu hermenn til Kúbu (Theodore Roosevelt’s Rough Riders).  Árið 1953 jók borgin við land sitt með sameiningu úthverfanna, sem voru áður utan borgarmarkanna.  Nafn borgarinnar er líklega fengið úr tungu Caloosa og þýðir eldstautar.  Áætlaður íbúafjöldi árið 1990 var 280 þúsund.