Jacksonville er hagsælasta borgin í fylkinu.  Þar er stór hafskipahöfn og miðstöð viðskipta, iðanaðar, fjármála, menningar og menntunar í norðurhluta fylkisins og Suðuraustur-Georgíu.  Meðal þess, sem er framleitt í borginni og nánasta umhverfil, eru timbur, pappír, efnavörur, matvara og vindlar.

Ferðaþjónustan er á uppleið og sjóherinn á stóra herstöð í næsta nágrenni.  Þarna eru Jacksonville-háskólinn (1934), Norður-Flórídaháskólinn (1965), Edward Waters-háskólinn (1866) og Jones-háskólinn (1918).  Meðal menningarstofnana má nefna Sögu- og vísindasafnið, Coliseum, Wolfsone-garðinn og Gator Bowl og á íþróttasviðinu er borgin þekkt fyrir ruðingsboltaleiki háskólanna.  Jacksonville er heimaborg Jagúaranna, sem er atvinnumannalið í ruðningsbolta.

Franskir húgenottar stofnuðu til fyrstu byggðar hvítra manna á borgarstæðinu árið 1564.  Karólínuvirkið, sem þeir byggðu á hæð fyrir ofan byggðina og Jackson-ána, var eyðilagt árið 1565, þegar spænskar hersveitir frá St Augustine réðust á bæinn.  Englendingar náðu honum undir sig seint á 18. öld.  Borgarstæðið var byggt á ný 1816 og árið 1822 var byggðin skipulögð og nefnd eftir Andrew Jackson, sem varð fyrsti landstjóri Flórída og síðar forseti BNA.  Þarna varð síðan mikilvæg miðstöð útflutnings timburs, baðmullar og sítrusávaxta.  Borgin var sameinuð mestum hluta Duval-sýslu árið 1968 og varð þar með ein af stærstu borgum BNA (2003 km²).  Áætlaður íbúafjöldi árið 1990 var rúmlega 673 þúsund.