Heildarflatarmál Delawarefylkis er 6.447 ferkílómetrar (hið annað minnsta í BNA).  Sambansstjórnin á 2,4% landsins.  Fylkið er nokkurn veginn þríhyrnt í lögun, mest 154 km frá norðri til suðurs og 58 km frá austri til vesturs.  Hæð yfir sjó nær frá sjávarmáli í 152 m á ónefndri hæð í norðurenda fylkisins..  Meðalhæð yfir sjó er 18 m (lægsta fylki BNA).  Atlantshafsströndin er 45 km löng.

Langstærstur hluti Delaware (95%) eru á Delmarvaskaga.  Meðfram ströndinni eru setlög, sem dýpka til suðurs, þar sem þau eru allt að 3.000 m þykk, og hæsti hluti strandlengjunnar liggur 30 m yfir sjó.  Jarðvegur er víðast tiltölulega ófrjór.  Við austurlandamæri fylkisins eru mýrlendi og um sunnanvert miðbikið eru Cedar-mýrarnar.  Nyrzt, á Piedmont-sléttunni , er öldótt landslag, sem hvílir á myndbreyttu bergi í 75-125 m hæð yfir sjó.  Þar er jarðvegur talsvert frjósamari en meðfram ströndinni.

Inni í landi eru engar stórar ár en ósar Delawarefljóts mynda landamæri fylkisins.  Flestar árnar renna til austurs í átt að Delawarefljóti, ósum þess eða beint í Atlantshafið (Christina, Smyrna, Leipsic, St Jones, Broadkill og Indiánaáin).  Hvergi eru stór stöðuvötn en sum þeirra eru notuð til sundiðkana og veiða.

Loftslagið er temprað og rakt og víðast svipað.  Meðalhiti á veturna er 1,7°C en stundum fer hann niður fyrir frostmark (u.þ.b. 100 daga á ári).  Meðalhitinn á sumrin er 24°C.  Mestur verður hann 32,2°C í 30 daga á ári.  Lægsta skráða hitastig (1893) var -27,2°C og hið hæsta (1930) 43,3°C.  Báðar mælingarnar voru gerðar í Millsboro.

Flóra og fána.  Skóglendi ná yfir u.þ.b. 30% landsins, aðallega eik og fura á strandsvæðinu og túlípanatré á Piedmont-sléttunni.  Algengar trjátegundir auk henna fyrrnefndu eru rauðeik, hvíteik, víðieik, hikkorítré og rauður hlynur.  Af blómategundum má nefna nokkrar tegundir lyngrósar (rhododendron), vatnaliljur og önnur villt blóm.

Víðast í fylkinu má finna dádýr, refi, þvottabirni, þefdýr, pokarottur, kanínur, moldvörpur, íkorna og moskrottur.  Fuglafánan er einnig fjölbreytt.  Delawareflói er mikilvægt vetrardvalarsvæði fyrir mikinn fjölda fugla.  Fyrir ströndinni veiðist talsvert af fiski og ostrum.

Náttúruauðæfi, framleiðsla og iðnaður.  Einu verðmætu jarðefnin í fylkinu eru sandur og möl, sem finnast alls staðar en þó mest í norðurhlutanum.  Örlítið finnst af magnesium, leir, eðalsteinum og járngrýti.

Lítill iðnaður byggist á trjáviði, einkum í smáskógasvæðum, þar sem fura, eik og fleiri trjátegundir eru nýttar.  Gulösp og önnur tré eru notuð til framleiðslu spóns.  Lítið eitt er framleitt af viðarkvoðu.  Mikið er um kjúklingarækt og eggjaframleiðslu og nokkuð er ræktað af kartöflum, sojabaunum, eplum, hnetum, melónum og berjum.

Fiskveiðar og vinnsla er talsverð.  Krabbi er verðmætastur en ostrur og annar skelfiskur og sjóbirtingur vega líka þungt.

Helztu iðnaðarvörur eru dúkur úr gerviefnum, farartæki og varahlutir, matvæli, nákvæmistæki, gúmmí- og plastvörur, prentað efni og tæki til iðnaðar.