Samkvæmt manntalinu frá 1990 var íbúafjöldi fylkisins 666.168 og hafði fjölgað um 12,1% áratuginn á undan.  Að meðaltali bjuggu þá 103 manns á hverjum ferkílómetra.  Flestir íbúanna búa í norðurhluta fylkisins.  Hvítir voru 80,3% og negrar 16,9% auk 2.301 kínverja, 2.183 af asískum uppruna og 1.982 indíánar.  Í kringum 16.000 manns voru af spænsku bergi brotin.

Menntun og menning.  Þingið stofnaði almennan fræðslusjóð árið 1796 en skólakerfi var ekki komið á fót fyrr en 1829.  Á níunda áratugi 20. aldar voru u.þ.b. 170 ríkisreknir grunnskólar í landinu með 97.800 nemendum.  Samtímis stunduðu 17.800 nemendur nám í einkaskólum.

Fyrsta æðri menntastofnunin, Newark College (nú Delawareháskóli í Newark), var stofnuð árið 1833.  Eftir 1980 voru slíkar stofnanir orðnar 10 með rúmlega 40.000 stúdenta.  Auk framangreinds háskóla má nefna Delaware State College (1891) og Wesley Collega (1873), sem eru báðir í Dover, Goldey-Beacom College (1886) í Wilmington og Wilmington College (1967) í New Castle.

Helztu menningarstofnanir fylkisins eru Henry Francis du Pont Winterthur-safnið í grennd við Wilmington (rúmlega 150 salir fyrir mismunandi tímaskeið), bandaríska skreytilist tímabilsins 1640-1840, og Hagley-safnið í Wilmington, sem er helgað bandarískum iðnaði.

Íþróttir og afþreying.  Frábærar baðstrendur við Atlantshafið eru aðalútivistarsvæðin fyrir sund, aðrar vatnaíþróttir og sjóstangaveiði.  Rehoboth-strönd er talin aðalútivistarsvæðið en auk hennar má nefna Bethanyströnd og Fenwickeyju.  Skeiðvellir eru víða, s.s. Dover Downs (Dover).