Bridgeport er í farabroddi iðnaðarborga Connecticut-fylkis og mikilvæg fjármálamiðstöð.  Íbúarnir framleiða m.a. þyrlur og elektrónísk tæki.  Ferjur eru gerðar út milli Port Jefferson, New York og Bridgeport.  Borgin er setur Bridgeport-háskóla (1927), Háskóla hins heilaga hjarta (1963) og Verkfræðiskóla Bridgeport (1924).  Það er áhugavert að heimsækja Barnumsafnið og líta á Tom Thumb-styttuna, sem var reist til heiðurs P. T. Barnum og Charles S. Stratton (Tom Thumb), sem bjuggu í borginni.  Byggð fór að myndast á þessum stað árið 1839.  Hún óx smám saman og byggðist á fiskveiðum.  Hröð iðnvæðing hófst eftir borgarastyrjöldina.  Nafn hennar er dregið af kláfi, sem var byggður nærri höfninni.  Áætlaður íbúafjöldi árið 1990 var rúmlega 140 þúsund.