Arkansasáin er stór þverá Mississippifljótsins, 2334 km löng, og kemur upp í Mið-Colorado í Sawatch-fjallgarðinum, sem er hluti Klettafjalla.  Efstu upptök hennar þar eru í 4270 m.y.s. og hún hefur að mestu austlæga stefnu og er mjög straumhörð á leið sinni niður úr fjöllunum, þar sem hún hefur grafið sér djúp gljúfur, s.s. Royal Gorge.  Á leið sinni um sléttur Kansas breiðir hún úr sér og rennur mun lygnari þar til hún kemur til Oklahoma.  Þar renna til hennar tvær þverár, Cimarron- og Kanadaáin.  Á einum stað í Kansas sveigir áin til norðurs á litlu svæði en rennur ella að mestu til suðausturs þar til hún hverfur í Mississippifljótið skammt ofan Arkansasborgar. 

Vatnsborð árinnar er mjög misjafnt og nokkrar stíflur hafa verið byggðar til að jafna rennslið, til áveitna og raforkuframleiðslu.  Einhver tilkomumesta stíflan er kennd við John Martin í Suðaustur-Colorado (1948).  Á áttunda áratugnum varð áin skipgeng alla leið til Tulsa í Oklahoma.