|
Alaska
er svo strjálbýlt, að íbúafjöldinn er ekki nema 1 íbúi á hverja
2,5 km². Mesta fjölgunin
varð strax eftir síðari heimsstyrjöldina.
Árið 1940 var íbúafjöldinn 72.524 en árið 1990 var hann
kominn upp í 551.947. Hluti
íbúanna er af erlendu bergi brotinn, s.s. rússnesku, filipínsku, japönsku,
kínversku og norrænu. Fjöldi
frumbyggja, inúíta, indíána og aleuta er u.þ.b. 64.000.
Meiri hluti þeirra lifir að hætti forfeðranna og aflar viðurværis
á sama hátt og þeir en hinir búa í þorpum og bæjum við nútímalifnaðarhætti
og stunda ýmiss konar störf.
Inúítar
eru fjölmennastir frumbyggjanna. Þeir
búa með ströndum fram við Íshafið og Beringshaf og í hinum stóru
óshólmum Yukon- og Kuskokwimánna.
Sumir eru fiskimenn, veiðimenn og pelsveiðimenn.
Aðrir stunda hreindýrabúskap eða viðskipti í fjölmennari bæjum
og borgum.
Indíánar
eru næstfjölmennastir. Helmingur
þeirra eru tlingitindíánar, sem búa á eyjum og strönd landræmunnar.
Sumir stunda fiskveiðar á sumrin og gildruveiði og aðra veiðimennsku
á haustin og veturna en aðrir stunda viðskipti.
Allmargir starfa í niðursuðuverksmiðjum á sumrin og margir
varðveita siði og venjur forfeðranna með minjagripagerð.
Haida
og tsimshian indíánar
komu í landræmuna frá Brezku Kólumbíu.
Þetta eru skyldir ættbálkar, sem eru þekktir fyrir
listmunagerð úr tré, beini og skeljum og haglega skreyttar minningarsúlur,
einkum úr sedrusviði. Margir
tsimshianar búa í þorpinu Metlakatla, sem er að hluta til rekið á
samvinnugrundvelli. Þeir eiga fiskibáta og reka laxniðursuðu, fiskiræktarstöðvar
og sögunarmyllu. Athapaskanar
búa dreifðum þorpum inni í landi og í suðurhlutanum.
Margir þeirra eru veiðimenn.
Aleutar
eru náskyldir inúítum en tala sitt eigið tungumál og hafa eigin siði.
Þeir eru góðir fiskimenn og búa á hinum þokusömu Aleut- og
Pribilofeyjum, Alaskaskaganum og Kodiakeyju.
BORGIR
Um
það bil 66% íbúanna býr í bæjum og borgum. Borgirnar eru jafnnútímalegar og borgir annars staðar en
mun lengra er á milli þeirra og mikið strjálbýli utan þeirra.
Samgöngur til þeirra og frá þeim eru stundum erfiðar eða ómögulegar
landleiðina.
Anchorage
er langstærsta borgin. Hún
er í miðjum suðurhlutanum við utanverðan Cookfjörð fyrir ofan
Knik Arm. Hún er miðstöð
loftflutninga og aðalherstöð norðurhersins. Anchorage hefur stækkað mikið, einkum á áttunda áratugi
20. aldar. Þá óx íbúafjöldinn
úr 48.081 í 174.431, 260% fjölgun á einum áratug.
Árið 1964 jafnaði
jarðskjálfti hluta miðbæjarins við jörðu.
Fairbanks
er næststærsta borgin. Hún
er við Chenaá, aðalþverá Yukonárinnar, á sléttunum inni í
landi. Mikilvægi hennar
byggist á samgöngum við aðra minni bæi á sléttunni og á
heimsskautssvæðinu og olíuvinnslusvæðin í fjöllunum fyrir norðan.
Borgin er aðalmiðstöð Alaskajárnbrautarinnar og
vegakerfisins.
Juneau,
höfuðborgin, er nyrzt í landræmunni.
Hún er eina höfuðborgin í BNA, sem er ekki hægt að komast
til landleiðina. Aðalatvinnuvegirnir
eru þjónusta, ferðaþjónusta, námugröftur og fiskveiðar.
Mörgum ferðamönnum finnst hún líkjast San Francisco vegna húsanna,
sem standa þétt saman við bugðóttar götur í fjallshlíðunum.
Greens Creek, einhver stærsta silfurnáma í BNA, er nærri
borginni. |
