Borgarmyndin.  Götur borgarinnar eru breiðari en í öðrum borgum í Alaska.  Í miðbænum eru Z.J. Loussac bókasafnið, tónlistarhöll borgarinnar, veitingahús, hótel, leikhús, alríkisbyggingin, ráðhúsið og pósthúsið.   Efnahagur borgarinnar byggist aðallega á þjónustu við ríkisstjórnina og herinn.  Bygging Elmendorf flughersstöðvarinnar og Fort Richardson í síðari heimsstyrjöldinni gerði Anchorage að miðstöð hervarna og ýtti undir grózku hennar.  Hernaðarlegt mikilvægi og lega borgarinnar gerðu hana að miðstöð flugsins.  Alþjóðaflugvöllurinn þjónar nokkrum innlendum og erlendum flugfélögum.  Umferð sjó- og vatnaflugvéla er líka mikil og litlar flugvélar þjóna farþegum, sem ætla til afskekktra staða.  Aðalstöðvar járnbrautanna eru í Anchorage og höfnin var opnuð 1961.  Hún er orðin hin stærsta í miðsuðurhluta landsins.  Vöruflutningar landleiðina eru líka mikilvægir fyrir borgina, því að hún hefur beint vegasamband við annarra borga, m.a. um Alaskahraðbrautina.  Borgin er miðstöð vörudreifingar, viðskipta, fjármálastarfsemi og olíuiðnaður hefur vaxið hraðfara.

Íbúarnir og menningin.  Menntakerfi borgarinnar er mjög gott.  Þar eru allar gerðir skóla.  Aðalhátíð borgarinnar er Skinnahátíðin í febrúar ár hvert.  Þá er margt til gamans gert, s.s. inúítadansar, listsýningar, skrúðgöngur og heimsmeistarakeppnin í hundasleðaakstri.  Íbúafjöldinn var u.þ.b. 227.000 árið 1990.  Borgin er alþjóðleg, íbúarnir eru flestir aðfluttir og eiga því mismunandi menningarlega bakgrunn.  Í borginni eru rúmlega 160 almenningsgarðar, þ.m.t. 10 stór verndarsvæði.  Skíðaferðir, íshokkí, golf og sund eru vinsælar íþróttir og margir njóta þess, að fara í tjaldferðir í hinni stórkostlegu náttúru landsins.  Margir sækja afþreyingu á George Sullivan-íþróttaleikvanginum, leiklistarmiðstöðinni, Eganráðstefnumiðstöðinni og víðar.

Atvinnulífið.  Anchorage er viðskiptamiðstöð fylkisins.  Höfuðstöðvar margra stórra og smárra fyrirtækja eru í borginni, s.s. olíu- og gasiðnaðarins, fjármála- og fasteignafyrirtækja, samgangna, vöruflutninga og ríkistjórnarinnar.  Framboð ferðaþjónustu er mikið og vex stöðugt.  Rúmlega 9000 manns tengjast herstöðvunum í fort Richardson og Elmendorf AFB.  Atvinnuleysi er lítið en svolítið árstíðabundið.  Alls hafa 924 veiðikvóta, þótt fiskiðnaðurinn eigi sér ekki höfuðstöðvar í borginni, enda stunda veiðikvótahafar aðallega veiðar annars staðar, s.s. frá Bristol Bay, Kodiak eða Cordova.

Samgöngur.  Ríkið rekur alþjóðaflugvöllinn í Anchorage og Lake Hood flugbátasvæðið, innanlandsvöllinn Merrill Field og flugvelli flughersins.  Anchoragehöfn tekur við u.þ.b. 85% allrar vöru, sem er síðan flutt landveginn með járnbrautum.  Nokkur pramma- og flutningabílafyrirtæki eru í fullum gangi.  Járnbrautin tengir Anchorage, Seward, Whittier og Fairbanks.

Loftslagið er mismunandi eftir landshlutum.  Á veturnar er hiti mismunandi mikið neðan frostmarks og á sumrin víða svipaður því, sem við eigum að venjast hér heima.  Meðalársúrkoman er u.þ.b. 4125 mm, ekki ósvipað og víða á suðurstönd Íslands.

Neyzluvatn er leitt alla leið frá Chugachfjöllum, uppistöðulóni Shipárinnar, frá djúpum borholum og vatnshreinsunarstöðinni Gridwood.  Enstar Natural Gas Company sér íbúunum fyrir náttúrulegu gasi, sem er algengasta og ódýrasta orkulindin til húshitunar.  Rafmagn skaffa Anchorage Municipal Light & Power og Chugach Electric Association, sem kaupa það bæði frá Eklutna Hydro Facility, sem er í eigu alríkisstjórnarinnar, og ríkisreknum orkuverum Lake Hydro Facility.  Fyrstnefnda rafmagnsfyrirtækið á 8 orkuver, sem eru drifin með díselolíu og olíu.  Chugach Electric á 17 orkuver á Cookfjarðarsvæðinu, flest drifin með gasi, og tvö eru í eigu Cooper Lake Facility.  Opinber- og einkafyrirtæki annast sorphirðu.