Bahrain var fyrst
furstadæmanna til að finna olíu árið 1932 og verður líklega fyrst
til að þurrausa olíulindir sínar.
Bahrainbúar hafa því byggt efnahag sinn upp á fjölbreyttari
hátt en önnur lönd við Persaflóa. Samt sem áður byggist efnahagurinn að verulegu leyti á
framleiðslu hráolíu, náttúrugass og olíuhreinsun til framleiðslu
ýmissa olíuafurða. Þetta
gerir efnahaginn viðkvæman fyrir verðsveiflum á heimsmarkaði.
Landsmenn hafa langa reynslu í vöruflutningum og viðskiptum og
þeim hefur á margan hátt tekizt betur að byggja upp iðnað, verzlun
og þjónustu (fjármálaþjónustu) en mörgum öðrum Persaflóaríkjum. Þar sem olía finnst ekki, eru framleidd ýmiss konar efni úr
olíu, unnið við viðgerðir og viðhald skipa og rekinn margs konar
smáiðnaður. Stærsta álverið
við Persaflóa, ALBA (Aluminium Bahrain) og Olíufélag Bahrain hafa
verið arðbær fyrirtæki en einkaframtakið hefur ekki fengið mörg tækifæri
til að hasla sér völl. Landið
hefur lengi státað af mesta viðskipta- og fjármálamarkaði við
Persaflóann og ferðaþjónustunni vext stöðugt fiskur um hrygg.
Landbúnaður
og fiskveiðar.
Innan við 3% lands í Bahrain eru ræktanleg og landbúnaðurinn
nær ekki 1% af vergri þjóðarframleiðslu.
Langmestur hluti matvæla er fluttur inn, þótt eigin framleiðsla
dragi úr þörfinni á innflutningi á takmörkuðum svæðum.
Mestur hluti grænmetis og mjólkurafurða er þó framleiddur í
landinu sjálfu. Aðaláherzlan
er lögð á ræktun tómata, daðlna, banana, sítrusávaxta, mangos,
granatepla og alfalfa. Ríkið
hvetur einnig til ræktunar nautgripa og hænsna en drómedarar, kameldýr
og hestar eru ræktaðir til veðreiða.
Aukin mengun í Persaflóa, einkum frá olíulindum Kuvæt í
Persaflóastríðinu (1990), hefur útrýmt mörgum tegundum sjávardýra
(þ.m.t. rækju), sem voru mikilvægar fyrir sjávarútveginn.
Hann var þó hvorki fugl né fiskur fyrir, þrátt fyrir
tilraunir konungsins til að hvetja til einkaframtaks á því sviði og
stuðning við nútímavæðingu hans.
Iðnaður.
Hefðbundinn iðnaður landsins byggðist á smíði „dhows”,
arabískra seglbáta, fiskveiðum, perluköfun og framleiðsla
reyrmottna. Allar þessar
athafnir eru nú í mjög smáum stíl.
Olíuframleiðslan
hefur ætíð verið lítil miðað við hin olíulönd Miðausturlanda
og hreinsun olíu frá Sádi-Arabíu hefur verið miklu mikilvægari
eftir uppgötvun olíulindanna miklu á meginlandinu.
Olíulindir Bahrain endast tæpast lengur en skammt fram á 21.
öldina en gaslindirnar undan ströndum landsins munu endast mun lengur.
Álplötuverksmiðja var tekin í notkun árið 1986 og í
tengslum við hana eru m.a. framleiddar álhurðir og gluggarammar úr
áli. Viðhald skipa fer aðallega
fram í Mina’ Salman í grennd við Manama og stór skipasmíðastöð
er á Al-‘Azl-eyju. Léttur
iðnaður byggist m.a. á framleiðslu byggingarefnis, húsgöngum,
drykkjarvörum, plastvörum og ýmsum neyzluvörum.
Ríkið á stóran hlut í þessum nútíma iðngreinum.
Olíu- og gaslindir og framleiðsla tengd þeim er þjóðnýtt.
Árið 1990 fór ríkið að sækjast eftir erlendri fjárfestingu
á þessu sviði.
Fjármál
og viðskipti.
Ríkisstjórnin hefur hvatt til starfsemi banka, tryggingarfyritækja
og annarra fjármálastofnana á erlendri grund og gert landið að
vaxandi miðstöð fjármála. Þessi
þróun hefur haft góð áhrif á viðskiptajöfnuðinn.
Seðlabanki landsins gefur út gjaldmiðil landsins, dinar.
Auk hans starfa innlendir og erlendir viðskiptabankar og fjárfestingarbankar.
Kauphöllin var opnuð árið 1989.
Aðalinnflutningurinn
byggist á hráolíu, sem er pumpað um neðansjávarleiðslu frá Sádi-Arabíu
til hreinsunar í Bahrain. Aðrar
mikilvægar vörur eru vélbúnaður, matvæli og efnavara.
Aðalútflutningsvörurar eru hreinsuð olía og olíuvörur og
álvörur. Sádi-Arabía er
aðaviðskiptalandið auk BNA, Japans og Bretlands.
Samgöngur.
Vegakerfi landsins er mjög velbyggt með slitlagi og hraðbrautartengingum
við Al-Muharraq- og Sitrah-eyjar og við Sádi-Arabíu. Járnbrautir eru engar en aðalborgir og þorp njóta góðra
samgangna með rútum og leigubílum.
Langflestar fjölskyldur landsins eiga eigin farartæki.
Aðþjóðaflugvöllurinn á Al-Muharraq-eyju er einhver fjölfarnasti
flugvöllur Miðausturlanda og miðstöð margra mikilvægustu
millilandaflugfélaga heims. Manama
er miðstöð flugfélagsins Gulf Air, sem er ríkisrekið með þáttöku
ríkisstjórna Óman, Qatar og Sameinuðu arabísku furstadæmanna.
Flutingaskip annast áætlunarsiglingar frá landinu til annarra
hafna við Persaflóa, Pakistan og Indlands. |