Þjóðhöfðingjar Englands eru æðstu menn eyjanna og skipa þar aðallandsstjóra.  Í fararbroddi ríkisstjórna eru forsætisráðherra.  Landstjórinn tilnefnir 16 manna öldungadeild en 49 þingmenn eru kosnir í fulltrúadeild.  Eyjunum er stjórnað frá Nassau og þeim er skipt í 16 sýslur.  Þær tilheyra Brezka samveldinu og eru aðilar að Sameinuðu þjóðunum, OAS , EB, CARICOM o.fl.

Frjálslyndi framfaraflokkurinn (PLP; Progressive Liberal Party) var stofnaður árið 1953. Stofnendur voru Bahamabúar, sem voru andsnúnir stjórn fámenns hóps fólks úr viðskiptalífinu, sem var kallaður „The Bay Street Boys”.  PLP óx stöðugt fiskur um hrygg og kom fulltrúum á þing árið 1967 og árið 1972 vann flokkurinn 29 af 38 þingsætum. 

Bahamabúar héldu fyrstu frjálsu kosningar sínar 1977 eftir fengið sjálfstæði árið 1973.  Lynden O. Pindling („Black Moses”) hafði löngum legið undir gagnrýni fyrir stefnu sína í efnahags- og stjórnmálum.  Þrátt fyrir það fékk PLP 31 af 38 þingsætum í kosningunum, en harðlínustefnan - „svart vald” - hafði komið niður á ferðaþjónustunni, þannig að ferðamönnum fækkaði.  Pindling jók afskipti yfirvalda af atvinnulífinu og neyddi mörg fyrirtæki til að ráða Bahamabúa í stöður, sem útlendingar höfðu með höndum.  Auk þess voru lagðir auknir skattar á útlent vinnuafl og söluverð fasteigna, sem voru seldar útlendingum.  Yfirvöld sögðust hafa skapað svarta millistétt á þennan hátt.

Aðgerðir yfirvalda í skattamálum hafa næstum kollvarpað stöðu landsins sem skattaparadísar hinna ríku.  Mörg „töskufyrirtækin”, sem voru skrásett þar, hafa flutzt til Caymaneyja, þar sem skattar eru lágir.

Í kosningunum 1983 fékk PLP (Pindling) 53% atkvæða og meirihluta á þingi.  Svipuð niðurstaða varð árið 1987, þrátt fyrir að Pindling lægi undir ásökunum um aðild að sölu eiturlyfja (tengdri Everett Bannister).

Kosningunum á miðju ári 1992 lauk með sigri Þjóðfrelsishreyfingarinnar (Free National Movement) og Hubert Ingraham var valinn forsætisráðherra.  Þar með lauk 27 ára valdaferli Pindlings.  Rannsókn á ákæruatriðum á hendur Pindling stendur enn þá yfir.  Þingið var skipað 49 þingmönnum 1995 (17 PLP, 32 FNM).  Forsætisráðherra þá var Mr. Ingram.

Ríkisfjármál.  Hagstæð skatta- og viðskiptalög hafa laðað aragrúa fjármögnunar- og hlutafélaga að.  Árið 1987 var u.þ.b. 10% af brúttóþjóðartekjum veitt til atvinnuuppbyggingar.  Að Lundúnum frátöldum er Nassau stærsti fjármálamarkaður fyrir Evrópugjaldmiðla.  Hinn 31. des. 1986 voru 372 bankastofnanir skrásettar á Bahamaeyjum.  Helztu fjáröflunarleiðir ríkisins eru leyfisgjöld til reksturs fyrirtækja, óbeinir skattar o.fl., en tekju-, eigna-, fjármagns- og erfðafjárskattar eru í lágmarki.