Flugsamgöngur eru mikilvægar fyrir íbúa Bahamaeyja.  Góðar tengingar við bandarískar, mið- og suður-amerískar og evrópskar stórborgir gera það að verkum, að flestir ferðamenn og viðskiptafólk kemur á vegum loftsins til eyjanna.  Innanlands er mest ferðast með flugvélum.  Auk tveggja alþjóðaflugvalla við Nassau og Freeport eru u.þ.b. 60 aðrir flugvellir, brautir og flugbátahafnir á öllum eyjum, þar sem þörf er á vegna viðskipta og ferðaþjónustu.

Samgöngur á sjó eru líka mikilvægar.  Aðalhafnirnar eru í Nassau og Freeport.  Þar fer fram mestur hluti utanríkisviðskipta og móttaka skemmtiferðaskipa.  Höfnin í Matthew Town á Great Inagua hefur sérstöðu sem saltútflutningshöfn.  Aragrúi póstbáta og fragtskipa tengja Nassau við aðrar hafnir á byggðum eyjum.  Fjöldi hafna fyrir lystisnekkjur, skútur og seglbáta er mikið öryggisatriði fyrir gesti, sem koma á eigin farskjótum yfir hafið og sjóstangaveiðimenn.

Vegakerfið er bezt á þróuðustu eyjunum, New Providence, Grand Bahama og Eleuthera.  Meira en helmingur allra farartækja eyjanna ekur um á hinu 600 km langa vegakerfi New Providence.  Smám saman er unnið að vegagerð á öðrum eyjum eftir þörfum.