Long Island Bahamaeyjar,


LONG ISLAND
BAHAMAEYJAR

.

.

Utanríkisrnt.

Booking.com

Heildarflatarmál 448 km² og íbúafjöldi 5.000.  Reglulegar flugferðir frá Nassau um George Town (Great Exuma) til Cape Santa Maria, Stella Maris, Deadman's Cay og Hard Bargain.  Leiguflug eftir þörfum frá ýmsum stöðum í Flórída og Bahamaeyjum.  Ferðir á sjó með flutningaskipum frá Nassau um George Town til Stella Maris og Deadman's Cay.

LANGEY er u.þ.b. 100 km löng og örfárra km breið og liggur í nv/sa-læga stefnu.  Hvarfbaugur liggur um hana þvera.  Austurströndin er klettótt en vesturströndin flöt og sendin.  Landslagið er prýtt grænum hólum og söltum mýrum og fenjum.  Landbúnaður er stundaður í stórum stíl, einkum nautgripa- og grænmetisræktun.  Ennfremur eru bátasmíðar, fiskveiðar, saltvinnsla (u.þ.b. 300.000 tonn á ári) og ferðaþjónusta mikilvægar atvinnugreinar.

Fornminjar frá tímum Lucaya, sem fundizt hafa, gefa til kynna, að þeir hafi haft þar búsetu og nefnt eyjuna Yuma.  Þessi kynstofn indíána var af forkólumbískum stofni.

Hinn 15. Oktober 1492 lenti Kólumbus við norðurodda eyjarinnar og skírði hana Fernandina.  Allan tímann, sem nýlenduveldi Evrópu rifust og slógust um lönd og álfur, ávann saltvinnslan á eyjunni sér mikilvægari sess.  Löngu áður en fyrstu konungssinnarnir komu sér fyrir á eyjunni og fóru að rækta baðmull, var farið að flytja salt út til Bermuda og New York.

Eftir að baðmullarræktin hrundi á 19. öld var farið að rækta nautgripi og grænmeti.

Skoðunarverðir staðir
Santa Mariahöfði
er einhver mest hrífandi staður Bahamaeyja nyrzt á eyjunni, þar sem Kólumbus lagði að landi.

Calabash Bay er forkunnarfagur flói í grennd við höfðann.  Baðströndin er >5 km löng og mjög vinsæl.

Kóralrif fyrir norðurströndinni.  Það er urmull af fiski í sjónum og aðstæður til köfunar eru mjög góðar.  Á kóralrifjunum er m.a. að finna elgkóralla og svarta kóralla, sem smám saman hafa horfið annars staðar vegna sjávarmengunar.

Burnt Ground er dæmigert ytrieyjaþorp á norðurhluta eyjarinnar.

Stella Maris er tiltölulega ný byggð á norðureynni.  Þar býr tiltölulega margt þýzkumælandi fólk.  Gistiað-staða og afþreying er vel úr garði gerð fyrir gesti, sem koma til að slappa af. Margt ríkt eftirlaunafólk sækir þangað.  Golfvöllur og flugvöllur.
Conception Island.  Frá Stella Maris er vinsælt að fara þangað í köfunarleiðangra, því að þar er að finna á fertugasta tug skipsflaka á sjávarbotni auk neðansjávarhella (einkum í Rum Cay) og kóralrifja.

*Simms er dæmigert ytrieyjaþorp með stráþöktum húsum og gamalli kirkju.  H.M fangelsið er líka þess virði að kíkja á.

Salt Pond er upphafsstaður einnar mestu siglingarkeppni á Bahamaeyjum, The Long Island Regatta.

Deadman's Cay.  Þar er að finna stórkostlega dropasteinshella.  Hinn kunnasti er Deadman's Cove. Hellaristur og teikningar sýna, að frumbyggjar eyjarinnar hafa haft þar búsetu.

Clarence Town er stærsta þorp eyjarinnar.  Höfnin er umgirt litríkum húsum.  St. Paul's-kirkjan trónir yfir því.  Faðir Jerôme lét reisa hana í norðafrískum stíl.  Í grennd bæjarins er skemmtilegt svæði til köfunar. Blue Hole er neðansjávarhellir með 70 m breiðu opi, sem ekki hefur verið kannaður til hlítar.

Diamond Cristal Salt Co. er saltvinnsla í grennd við Hard Bargain.  Hægt er að fá að skoða hana.  Hún er önnur stærst á Bahamaeyjum (300.000 t.á ári).

 TIL BAKA     Ferðaheimur - Garðastræti 36 - 101 Reykjavik - info@nat.is - Heimildir            HEIM