Inaguaeyjar eru tvær:  Great- og Little Inagua.  Flatarmál þeirra er 1.657 km².  Íbúafjöldi u.þ.b. 1.500. 

Áætlunarflug frá Nassau og South Caicos til Matthew Town á Great Inagua.  Ferðir á sjó oft í viku frá Nassau um Acklins og Long Island til Matthew Town.

STÓRA INAGUAEYJA liggur u.þ.b. 600 km suðaustan Nassau og Little Inagua 10 km norðan hennar.  Great Inagua er syðsta eyja Bahamaeyja.  Mikið er af söltum mýrum og vötnum og varpstöðvum margra sjaldgæfra fugla á eyjunni, sem er mjög strjálbýl.  Þar eiga tugir þúsunda flamingóa varpstöðvar.

Nafn eyjanna er dregið af spænsku orðunum ileno (fullur) og agua (vatn), enda voru þær undir yfirráðum Spánverja um tíma.  Um miðja 18. öld settust þar næstum eingöngu Frakkar vegna hernaðarlega mikilvægrar legu eyjanna.  Þegar um aldamótin 1800 var íbúunum ljóst verðmæti saltsins, sem vinna mátti úr mýrunum og lónunum.  Eftir að Matthew Town byggðist, risu heilmikil mannvirki til saltvinnslu og megnið af saltinu var flutt til Bandaríkjanna.

Í lok 19. aldar þróaðist vinnumarkaður fyrir útgerðir í Atlantshafssiglingum.  Skipafélög, s.s. Hamborgar-Ameríkufélagið, réðu áhafnir á Inaguaeyjum.  Vinnumarkaðurinn teygði sig alla leið til S.-Ameríku, en fjöldi Inaguabúa fór þangað til að vinna um skemmri og lengri tíma.  Þeir unnu m.a. við gerð Panamaskurðarins, lagningu járnbrautar í Mexíkó o.fl.  Fyrri heimsstyrjöldin hindraði þennan uppgang og margir fluttu frá Inagua.  Það var ekki fyrr en 1936, að bandarískir innflytjendur endurvöktu saltvinnsluna og reistu efnahaginn við aftur.  Saltvinnslan nemur u.þ.b. 750.000 tonnum á ári og þau eru flutt til Bandaríkjanna.

Höfuðbær Inaguaeyja, Matthew Town (íb. 1.400), er á Great Inagua.  Salthúsið í bænum er frá 18. og 19.öldum.  Hlið þess er skreytt með múrsteinum, sem teknir voru úr rústum bæjarins Port Royal á Jamaica.  Í grennd við bæinn er saltvinnsla Morton Salt Crystal Ltd., sem er meðal stærstu slíkra í heimi (750.000 tonn á ári).

**National Trust Park er einstætt náttúruverndarsvæði umhverfis Rosa-vatnið (Lake Windsor) á eyjunni Great Inagua.  Þar eru varpstöðvar u.þ.b. 40.000 flamingóa, sem eru þær stærstu í Vesturheimi.  Þar er að finna, eins og víðar við vötn, skeiðskarfa, fiskiskarfa og kólibrífugla og tugi þúsunda leðurblakna í karsthellum.  Hægt er að skipuleggja skoðunarferðir um þjóðgarðinn í samvinnu við Bahamas National Trust Bureau í Nassau P.O. Box 4105, sími (809) 323-1317.  North East Point er erfiður aðgöngu.  Þar eru rústir griðarstaðar (1900) Henri Christophe, sem síðar varð einvaldur á Haiti.

LITLA INAGUAEYJA liggur 10 km norðan Great Inagua.  Hún er 70 km², umgirt kóralrifjum og að mestu ósnortin.  Þar lifa villtar geitur og asnar, sem frönsku landnemarnir fluttu þangað auk nokkurra sjaldgæfra skarfategunda.