Flatarmál er 388 km² og íbúafjöldi u.þ.b. 4.000.  Áætlunarflug milli Nassau og The Bight.  Leiguflug eftir þörfum (þ.á.m. sjóflugvélar) til ýmissa staða á eyjunni.  Bátsferðir oft í viku til margra staða á eyjunni og milli Cat Island og annarra eyja í grenndinni.

Cat Island liggur u.þ.b. 160 km sunnan aðaleyjarinnar, New Providence.  Hún var skírð eftir brezka skipstjóranum Catt.  Þessi langa og mjóa eyja er meðal fegurstu og frjósömustu Bahamaeyjanna. 

Víða er hægt að finna merki um menningu indíána.  Spánverjar settust aðeins tímabundið að á henni.  Bandarískir konungssinnar settust að á seinni hluta 18. aldar og hófu baðmullarrækt, sem síðar var hætt og akuryrkja og grænmetisrækt var tekin upp.  Listavelgerðar vörur úr trefjum eru löng hefð á eyjunni og þær eru seldar í öllum stærri listmunaverzlunum og listamörkuðum á Bahamaeyjum.  Á sjötta áratugnum komst Cat Island á ferðaþjónustukortið.

Skoðunarverðir staðir
The Bight, höfuðstaður eyjarinnar, er fallegur bær.  Mörg hinna fyrrum bændabýla eru enn þá með stráþökum.  Í hinni fallegu, katólsku kirkju (1949), sem kennd er við heilagan föður Jérôme, eru mjög fallegar freskur.  Af óðalssetrinu Armbrister House frá nýlendutímanum  stendur einungis forhliðin.

Mount Alvernia er hæsti punktur Bahamaeyja, rétt norðan The Bight.  Efst uppi trónir einsetubústaðurinn, sem byggður er í spænskum stíl.  Þar á faðir Jérôme að hafa hafzt við.  Hann var upphaflega anglikani en snérist til katólskrar trúar og teiknaði nokkrar kirkjur á Bahamaeyjum.

Moss Town er gamall bær sunnan The Bight.  Enn þá sunnar er fallegur hafnarbær, Port Howe.  Þar standa rústir Deveaux-bústaðarins, sem bandaríski sjóliðsforinginn Andrew Deveaux lét reisa á plantekru sinni á 18. öld.  Deveaux tókst að ná Nassau úr höndum Spánverja árið 1783.

Kólumbusarhöfði er syðsti oddi eyjarinnar.  Þar er hellir, sem búið var í áður en Kólumbus kom til Vesturheims.

Cutlass Bay er vestan Port Howe.  Þar er paradís sjóstangaveiðimanna.  Enn þá vestar er Hawk's Nest, vaxandi ferðamannastaður, þar sem einnig er lögð áherzla á sjóstangaveiði.

Pigeon Cay.  Í norðaustlægri stefnu frá The Bight eru mörg vinaleg bændabýli.  Þegar 30 km leið er að baki er komið að höfðanum Pigeon Cay.  Þar er afburðagóð sandströnd og lón.  Rétt hjá er Bennett's Harbour.

Arthur's Town er stærsti bærinn á norðurhlutanum og upphafsstaður margra ævintýralegra skoðunarferða.  Kvikmyndleikarinn Sydney Poiter ólst þar upp.Little San Salvador er eyja hálfleiðis milli The Bight og Eleuthera (u.þ.b. 20 km).  Hún er orlofsparadís.  Skemmtiferðaskip koma þangað oft.