Eftirtaldar eyjar tilheyra Androseyjaklasanum:  Androseyjar, Joulter's Cays, Big Wood Cay,  Yellow Cay, Mangrove Cay og Curley Cut Cays.  Heildarflatarmál þeirra er 5.955 km² og íbúafjöldi er u.þ.b. 9.000.

Áætlunarflug frá Nassau til San Andros, Andros Town, Mangrove Cay og South Andros.  Leiguflug til annarra eyja.  Bátar sigla milli Nassau og Mastic Point, Fresh Creek og Mangrove Cay.
Andros liggur 45 km vestan New Providence.  Hún er stærst Bahamaeyja, flöt, vogskorin og þakin vötnum.  Lengd hennar er 170 km og breidd allt að 64 km.  Austurströndin er hólótt með nokkrum góðum baðströndin en vesturströndin (The Mud) er flatlend og mýrlend og lítt gróðri vaxin.  Inni á eyjunni vaxa pálmar, furu- og mahónitré, runnagróður og fenjatré  mýrum.  Í hafinu umhverfis eru uppeldisstöðvar margra sjávardýra og hún er þekkt fyrir fjölbreytt og einstakt neðansjávarlíf og á eyjunni eru varpstöðvar margra fuglategunda.  Velútbúnir kafarar geta skoðað neðansjávarhella og spænsk skipsflök.  Frá Andros er flutt neyzluvatn til mannflestu og þéttbýlustu eyjarinnar, New Providence (Nassau).

Spánverjar nefndu eyjuna „La Isla del Espirito Santo”, eyju heilags anda.  Vegna þess, hve óaðgengilegir margir staðir hennar hafa verið og eru enn þá, hafa sprottið upp um hana ýmsar þjóðsögur um Chickharnies (álfa með rauð augu, þrjá fingur og þrjár tær) og Lusca (dreka og margfætt skrímsli).  Indíána af seminolaættbálki flúðu hingað frá Flórída, þegar Spánverjar ruddust þar fram. Enskir sjóræningjar komu sér líka fyrir og álitið er að Henry Morgan hafi falið fjársjóð á eyjunni.  Hún fór ekki að byggjast fyrr en á 19. öld, þegar Englendingar settust að.  Upp úr 1965 var fyrst farið að huga að verulegri uppbyggingu, landbúnaði og nýtingu skóga.  Nýlega var farið í alvöru að huga að ferðaþjónustu.

Barrier Reef, Tongue of the Ocean.    Fyrir austurströndinni liggur næststærsta kóralrif heims, 170 km langt, sem fellur niður í 1.800 m djúpan ál (Tongue of the Ocean) að austanverðu.  Niðri í djúpunum eru hellar (Blue Holes), sem kunnir eru fyrir litblæinn í þeim.  Nokkrir þeirra eru á 20-30 m dýpi og í sumum þeirra virðast vera ósaltar lindir og umhverfi þeirra er mjög litskrúðugt.

Norður-Andros
Fresh Creek, Coakley Town, Andros Town.  Ein elzta byggðin á Andros er Coakley Town, sem stendur við Fresh Creek eins og Andros Town aðeins sunnar.  Þar stofnaði Dr. Wenner-Gren orlofssvæði.

Twin Lake Farm er í grennd við flugvöllinn.  Þar var byrjað að rækta ávexti, grænmeti og krydd.

AUTEC (Atlantic Undersea Testing & Evaluation Company) er neðansjávartilraunastöð, sem stofnuð var 1966.  Skammt þar frá er álverksmiðja Reynoldsfyrirtækisins.

Behring Point er lítið sjávarþorp 20 km sunnar.

Love Hill er fallegt þorp norðan Coakley Town á samnefndri hæð.

Staniard Creek er lítið þorp með við fallega strönd.  Í grenndinni er batíkverksmiðja, Androsia Factory.  Kafarar heimsækja gjarnan Small Hope Bay.

Nyrzti hluti Andros
NADCO (North Andros Development Company).  Nyrzti hluti eyjunnar, fyrrum veiðilendur, er nú í uppbyggingu fyrir ferðaþjónustu, landbúnað o.fl.  Þar er kominn flugvöllur og hótel.

Mastic Point er hafnarþorp á austurströndinni.  Í grennd við þorpið átti Chamberlain, sem síðar varð forsætisráðherra Breta, plantekrur, þar sem ræktaður var sísalhampur.

Nicholl's Town er 10 km norðar (1.000 íb.).  Litríkt fiski- og landbúnaðarþorp.

Morgans Bluff er bratt klettabelti skammt norðaustar.  Þar á sjóræninginn Henry Morgan að hafa bækistöð sína í stórum helli.

Joulter's Cays eru eyjar fyrir norðurströndinni, þar sem er vinsælt fuglaveiðisvæði.

San Andros er vestan Nicholl's Town.  Þar er uppbygging mjög mikil og svæðið vaxið furu og þakið vötnum.

Red Bay Village á vesturströndinni er athyglisvert þorp, þar sem íbúarnir lifa enn þá samkvæmt gömlum hefðum og siðum.

Mið-Andros
Moxey Town.  Miðhluti Andros er sundur skorinn stranda á milli.  Þar eru góðar veiðilendur fyrir skot- og stangaveiðimenn og skemmtilegt siglingasvæði.  Vatnaleiðirnar um North Bight, Middle Bight og South Bight til eyjanna Big Wood Cay, Yellow Cay og Mangrove Cay eru skemmtilegar.  Á síðast nefndu eyjunni er Moxey Town, þar sem er að finna gistiaðstöðu.

Suður-Andros
Congo Town er ný ferðanýlenda við Drigg's Hill.  Þar er flugvöllur.

The Bluffs er smáþorp við suðurveginn.  Því næst er komið að Long Bay Cays, þar sem sjóræninginn Edward Teach (Svartskeggur) liggur grafinn.

Cistern Point og Curley Cut Cays eru falleg landsvæði, sem skammt er til frá Mars Bay, sem er við enda vegarins í suður.