Allt frá forsögulegum tímum til nútímans hefur mikill fjöldi fólks flutzt milli staða og heimshluta. Sumir þjóðflokkar, sem hafa búið á einangruðum svæðum, hafa ekki hreyft sig úr stað í þúsundir ára.  Slíkt fólk er kallað frumbyggjar (aborigine, lat.: ab origine = frá upphafi).  Þessir frumbyggjar bjuggu fjarri öðru fólki og menningarsvæðum og tilvist þeirra varð ekki kunn fyrr en landkönnuðir og nýbyggjar ruddust inn á yfirráðasvæði þeirra.
Nokkrir mannfræðingar 20. aldar draga í efa, að þessir frumbyggjar hafa ævinlega búið á þeim svæðum, sem þeir fundust á.  Það er mögulegt, að einhverjir þessara þjóðflokka hafi flutt sig um set miklu fyrr en nokkrar sagnir eru til um.  Talið er, að forfeður frumbyggja Ameríku hafi flutzt yfir þurrlendið, þar sem Beringssund er nú, þótt engar heimildir séu til um það.

Á 20. öld voru fáir staðir, sem höfðu ekki verið kannaðir og voru ekki komnir undir áhrif nútímamenningar. Steinaldarmenning var við lýði inni í dýpstu frumskógum Suður-Ameríku og á eyjunni Nýju-Gíneu.  Þeldökkum og dvergvöxnum þjóðflokkum í Malasíu og á Filipseyjunum, sem býr í innfjöllum landanna, hefur tekizt að halda frumstæðum siðum sínum og menningu á mikillar truflunar

Eyjan Hokkaido er stærst norðureyja Japans.  Þar býr fólk af Ainu-þjóðflokki, sem var líkamlega ólíkt öðrum mongólaþjóðflokkum allt umhverfis.  Líkamleg einkenni og menning þessa fólks hafa að mestu horfið vegna blöndunar.  Það líkist nú Japönum og talar japönsku.

Frumbyggjar Ástralíu (aborigines) eru líklega þekktastir.  Þegar fyrstu Evrópumennirnir settust að í Ástralíu fyrir u.þ.b. 200 árum, voru frumbyggjarnir alls staðar á meginlandinu og Tasmaníu.  Áætlaður fjöldi þeirra á 18. öld er a.m.k. 300.000 af meira en 500 ættbálkum.  Árið 1980 voru þeir u.þ.b. 230.000.

Flestir mann- og fornleifafræðingar hallast að þeirri skoðun, að frumbyggjar Ástralíu og Tasmaníu hafi flutzt þangað fyrir u.þ.b. 40.000 árum.  Líklega komu þeir frá meginlandi Suðaustur-Asíu og kunna að hafa komizt til Ástralíu á landbrúm, sem nú eru sokknar í sæ.  Síðan evrópsku landnemarnir settust að í Ástralíu hefur hefðbundið líf og menning frumbyggjanna raskast æ meir.