Darwin er höfuðborg Norðurfylkis á skaga út í Tímorhaf við Clarence-sund andspænis Melvis-eyju.  Hún er nyrzt fylkishöfuðborga landsins og höfnin er tvisvar sinnum stærri en Sydneyhöfn.  Hún stækkar örast allra fylkishöfuðborganna, þótt hún sé þeirra minnst með tæplega 80.000 íbúa árið 1993.  Árið 1869 fékk hún nafn brezka forsætisráðherranum og varakonungi Palmerston, sem hún bar til 1911.  Árið 1839 var svæðið skirt í höfuð Charles Darwin, sem kom þangað með HMS Beagle.  Darwin-nafnið var tekið upp á ný 1911, þegar fylkjabandalagið tók við af Suður-Ástralíu.  Borgin er setur fylkisstjórnar Norðurhéraðsins.  Þar starfar fylkisþing í einni Deild (25) líkt og í öðrum fylkjum landsins.  Á miðju ári 1996 varð þing fylkisins fyrst vestrænna ríkja til að samþykkja lög um líknardráp.

Loftslag.  Við lá, að Darwin eyddist fimm sinnum, 1878, 1882, 1897, 1937 og 1974, vegna þess, að borgin er á leið hitabeltisfellibylja og verður reglulega fyrir tjóni af þeirra völdum á úrkomutímanum (nóv.-marz).  Fellibylurinn Tracy 1974 lagði 2/3 hluta borgarinnar í rust, olli skemmdum í þriðjungnum, sem eftir var, og drap 66 manns.  Ítrekaðar loftárásir Japana í síðari heimsstyrjöldinni skildu borgina eftir í rústum.  Darwin er í hitabeltinu með 20°C-30°C hita og 1500 mm meðalársúrkomu og stundum rignir eins og hellt sé úr fötu.  Þessi loftslagsskilyrði setja borgarbúum skorður í lífsháttum sínum og ráða að nokkru útliti borgarinnar.

Áhugaverðir staðir.  Afdrifaríkar loftárásir Japana og fellibylurinn Tracy breyttu byggingarstíl borgarinnar og framtíðarskipulagi hennar.  Fyrir stríð var Darwin lítil og óskipuleg borg, aðsetur perlu-, vísunda- og krókódílaveiðimanna, málmleitarmanna og kúreka.  Löngu áður en alþjóðlegra menningaráhrifa fór að gæta annars staðar í Ástralíu var Darwin orðin deigla kínverja, frumbyggjar, malæja, hvítra, indónesa og annarra þjóðerna.  Þetta ástand varð samt ekki til þess að frumbyggjar landsins væru meðhöndlaðir betur og með meiri virðingu en annars staðar í landinu.

Eyðileggingin í stríðinu opnaði möguleika til framtíðarskipulagningar byggðarinnar en á jóladag 1974 reið fellibylurinn Tracy yfir með 300 km vindhraða á klst og olli nærri algerri eyðileggingu á fjórum klukkustundum.  Í kjölfarið höfðu skipuleggjendur borgarinnar næstum hreint borð til að byrja á.  Með aðstoð byggingarmeistara lögðu þeir fram áætlanir, sem miðuðu að meiri reglu og ekki sízt húsum, sem stæðust fellibylji.  Borgin sjálf byggist á ferhyrninglöguðu skipulagi, sem er vænt gangandi vegfarendum.  Þrátt fyrir það, að borgin er afskekkt eru umferðarhnútar vandamál vegna þess að hún stendur úti á enda skagans með sjóinn á þrjá vegu (Frances-flói, höfnin og Fannie-flói).  Útborg hennar og úthverfi eru að stækka og umferðarvandamálið vex.

Hús, sem standast fellibylji, eru ekki augnayndi en inni á milli þeirra eru sums staðar falleg hús frá nýlendutímanum, sem hafa staðizt ósköpin eða verið endurbyggðar.  Meðal þeirra eru Fylkisstjórnarhúsið (1883), Fanny Bay-fangelsið (1883; safn), Gamla flotahúsið á staurum, sem hefur staðið nokkuð traustum fótum síðan 1920, Viktoríuhótelið, Kínverska hofið og félagsmiðstöðin með banyan-trénu, sem er kallað „Tré þekkingarinnar”.  Grasagarðurinn við Fanny-flóa skemmdist talsvert 1974 en var endurgerður til að sýna hina miklu fjölbreytni hitabeltisflórunnar.  Kakadu-þjóðgarðurinn er í 200 km fjarlægð frá borginni til austurs og margir gestir hans koma frá Darwin.  Lista- og vísindasafn Norðurhéraðsins er í nútímabyggingu við Fanny-flóa.  Þar er frumbyggjalist í hávegum höfð auk minja frá Asíu og Kyrrahafseyjum.  Lítið sædýrasafn er tengt byggingum safnsins.

Norðurhéraðsháskólinn er ein mesta menntastofnun borgarinnar (1988).  Menningaráhrifin er margvísleg í borginni, því þar býr fólk af a.m.k. 50 þjóðernum eða uppruna.

Efnahagsmál.  Á yzta hluta skagans er herstöðin Larrakeyah, sem er meðal stærstu vinnuveitenda borgarinnar auk þjónustuiðnaðar og opinberrar starfsemi.  Ferðaþjónustan er í mestum vexti og fylkisstjórnin leikur stórt hlutverk í henni.  Darwin er jafnfjarri Sidney og Singapúr og nær Jakarta í Indónesíu en flestum öðrum fylkishöfuðborgum Ástralíu.  Úraníum og kopar eru grafin úr jörðu í grennd borgarinnar og um höfnina fer mikið af nautakjöti og hrámálmum (sink og blý).  Meðal annarra náttúruauðæfa annars staðar í fylkinu er báxít, magnesíum, gull og náttúrugas.  Rækjuveiðar og perluköfun eru mikilvægir atvinnuvegir í Norðurhéraðinu og hafa löngum verið undirstöður atvinnulífs í Darwin.

Darwin er önnur endastöðvar norður-suðurjárnbrautarinnar og upphafspunktur 1486 km langs þjóðvegar suður til Alice Springs og áfram til Adelaide.  Bygging millilandaflugvallarins við Darwin skapaði nýjar tekjulindir, því að mörg alþjóðleg flugfélög nota hann.

Sagan.  Hollenzkir sæfarar á Arnhem voru fyrstir til að koma auga á norðurströnd Ástralíu á þriðja áratugi sautjándu aldar og Matthew Flinders skírði hana Arnhem Land þeim til heiðurs 1803.  Sundurlausar tilraunir voru gerðar til að nema land á ströndinni og Port Essington var yfirgefin 1849.  Suður-ástralskir bændur og spekúlantar stóðu að baki innlimun Norðurhéraðsins 1863 og gerðar voru fjórar tilraunir til landnáms þar að því loknu.  Þrjár þeirra mistókust á árunum 1863-68 og mælingamaðurinn George Goyder benti á Port Darwin sem framtíðarlandnám.  Hann kom þangað í febrúar 1869 og mældi fyrir borginni Palmerston.  Frumbyggjar svæðisins litu á landnám hvíta mannsins sem upptöku lands þeirra og Goyder vonaðist til að geta komizt að samkomulagi við þá með því að nota staðarnöfn úr þeirra Tungu.  Í marz 1870 var búið að skíra öll mæld svæði nöfnum stjórnmálamanna í Adelaide.  Áætlunin um landnámið í Darwin byggðust eins og fyrri áætlanir á gerð hafnar, sem þjónaði viðskiptum við Asíu og laðaði til sín bændur.  Lítið varð úr viðskiptunum og bændur sýndu þessu nýja stað lítinn áhuga, því að ókleift var að stunda hefðbundinn landbúnað í þessu loftslagi.

Darwin varð stöðnun að bráð og svo virtist sem bærinn yrði aldrei annað en símskeytastöð, þegar lagningu símalínunnar lauk 1872.  Þá fannst gull, sem breytti öllum aðstæðum líkt og í fylkjunum sunnar í álfunni 20 árum áður.  Perluiðnaðurinn óx og dafnaði eftir 1884 og gerði borgina að efnahagslegri miðstöð í norðurhlutanum.  Árið 1911 var þetta svæði innlimað í fylkjabandalagið en Darwin hélt áfram að vera útkjálkastaður fram á sjötta áratuginn.  Aukin námuvinnsla í héraðinu umhverfis borgina, hernaðarlega mikilvæg lega hennar og ferðaþjónustan ollu vexti borgarinnar eftir síðari heimsstyrjöldina.  Óútkljáðar deilur við frumbyggjana í fylkinu ráða miklu um framtíðarþróun þess.