Broome er hafnarborg við norðurströnd Roebruck-flóa í Vestur-Ástralíu.  Þessi hluti strandarinnar var kannaður 1688 og 1699, þegar enski ævintýramaðurinn og sjóræninginn William Dampier var á ferðinni, og skýrsla hans um gróðurlaust og óaðlaðandi umhverfið latti fólk til landnáms síðar.  Uppgötvun perluskeljamiða fyrir ströndinni 1883 leiddi til landnáms og svæðið var nefnt eftir Sir Frederick Napier Broome, landstjóra (1883-91).  Þarna óx og dafnaði miðstöð perluviðskipta, sem dró úr á fjórða áratugi 20. aldar og hrundi, þegar gerviperlur komu á sjónarsviðið á sjötta áratugnum.  Nú er skrapað saman ófullvöxnum ostrum á miðunum til að selja til perlubúgarða við Kure-flóa, 400 km norðaustar.

Broome er við norðurþjóðveginn mikla til Perth, 2300 km í suðvestri, og er aðalþjónustumiðstöð Kimberley-svæðisins, sem er beitiland fyrir nautgripi.  Kjötvinnslufyrirtæki borgarinnar flytur afurðir sínar út frá 825 m langri bryggju, sem var byggð til að mismunur flóðs og fjöru (9m) hefði sem minnst áhrif á starfsemina.  Olíuborun fyrir ströndinni og vinnsla náttúrugass eru veigamiklir atvinnuvegir.  Japanar réðust á borgina í síðari heimsstyrjöldinni.  Áætlaður íbúafjóldi 1991 var tæplega 9 þúsund.