Túnis við Miðjarðarhaf er höfuðborg Túnis og jafnframt stærsta borg landsins.  Borgin reis við enda hins grunna Túnisvatns, sem er vík inn úr Túnisflóa.  Hún er tengd hafnarborginni Halq al-Wadi, sem er 10 km norðaustar.  Líbýumenn stofnuðu borgina.  Þeir gáfust upp fyrir fönikíumönnum á 9. öld og létu þeim Karþagó eftir.  Árið 146 f.Kr, þegar þriðja púnverska styrjöldin stóð yfir milli Rómverja og Karþagómanna, tortímdu Rómverjar Karþagó og Túnisborg.  Síðan blómstraði borgin undir stjórn Rómverja.  Vegur hennar var mestur undir stjórn múslima, sem náðu henni á sitt vald á 7. öld.  Hún varð höfuðborg, þegar Aghlabids (800-909) voru við völd, og lifði blómaskeið sitt undir stjórn Hafsid-ættarinnar (1236-1574).  Hið heilaga rómverska keisaradæmi undir stjórn Karls V, keisara, lagði borgina undir sig árið 1535 og árið 1539 náðu Tyrkir yfirhendinni.  Spánverjar réðu borginni 1573-74, þegar Ottómanar tóku við.  Þeir réðu borginni þar til Frakkar gerðu Túnis að frönsku verndarsvæði á árabilinu 1881-1956.  Þjóðverjar náðu landinu undir sig 1942 en brezkar hersveitir ráku þá brott árið eftir.  Árið 1956, þegar landið fékk sjálfstæði frá Frökkum, var borgin lýst höfuðborg landsins.

Undirstaða atvinnulífsins í borginni er landbúnaðurinn í umhverfi hennar.  Mest er ræktað af ýmsu korni og ólifum og vinnsla þessara hráefna fer fram í henni.  Auk þess er mikið framleitt af textílvöru og fatnaði, teppum, sementi, styrktarjárni fyrir byggingar, efnavöru (fosfat), stáli, vélbúnaði og raftækjum.  Þarna er einnig aðalverkstæði járnbrautanna.  Nokkrar málmbræðslur starfa í Halq al-Wadi og í Magrin er blýgerð.  Ferðaþjónustan er mjög mikilvæg atvinnugrein.  Alþjóðaflugvöllurinn Al-‘Uwaynah og völlurinn, sem er kenndur við Túnis og Karþagó, eru norðaustan borgarinnar.

Helztu menningarmiðstöðvar borgarinnar eru tvær.  Sumarhátíð Karþagó í júlí ár hvert er orðin allþekkt.  Meðal áhugaverðra staða í borginni eru rómversku böðin (Antoníus; 2. öld), Sidi-Bu Sa’id-hæðirnar, markaðirnir (sugs) og moska Az-Zaytunah (8.öld), sem er elzta og merkasta minnismerki landsins.  Túnisháskóli var stofnaður 1960.  Suðaustan borgarinnar, í hlíðum Wadi Milyan-dals, eru tilkomumiklar rústir vatnsleiðslna, sem Rómverjar byggðu frá lindunum í Zaghwan-fjalli til Karþagó.  Áætlaður íbúafjöldi Túnisborgar 1984 var tæplega 600 þúsund í höfuðborginni sjálfri en tæplega 1,5 milljónir á öllu höfuðborgarsvæðinu.