Tawzar er vinjarborg í miðvesturhluta Túnis.  Hún er sunnan steppusvæðisins á pálmasvæði, sem er þakið saltlægðum (shatt).  Borgin er á eiði, sem aðskilur saltlægðirnar í al-Jarid og al-Gharsah, og hún er stundum nefnd Hlið eyðimerkurinnar.  Tawzar var fyrrum mikilvæg borg númidía við gömlu verzlunarleiðina milli Vescra (Biskra í Alsír) og Tacape (Qabis í Túnis).  Á 14. öld var þar fjörugur markaður.  Borgin hefur ætíð verið miðstöð andspyrnu berba gegn yfirráðum araba í landinu.  Byggingarstíll þessa landshluta kemur vel fram  í skreyttum forhliðum húsa borgarinnar, sem eru hlaðin úr gulum múrsteini með samhverfum, innlögðum lágmyndum.

Gott dæmi um þessa húsagerðarlist má sjá í Sidi ‘Abid-moskunni, zawiyah Sidi Muldi, bræðralagshúsi trúarinnar, Miklu moskunni (1030) og marabout (1282), gröf Sidi ‘Ali Abu Lifah.  Héraðið umhverfis borgina er þekkt fyrir tíbrá, sem heitt loft og endurspeglun saltkristalla saltlægðanna veldur.  Þessar hillingar gerðu ferðamönnum, sem voru að leita að vatni oft erfitt fyrir og olli stórum krókum á leið þeirra.  Á þessu svæði eru ræktaðar tvær tegundir gæðadaðlna, sem hafa verið fluttar út allt frá 11. öld auk handofinna teppa og handunnins silfurskrauts.  Áætlaður íbúafjöldi árið 1989 var u.þ.b. 25 þúsund.