Kenema er borg við járnbrautina og skarð í Kambuihæðum í suðausturhluta Sierra Leone.  Hún er miðstöð fyrirtækis, sem vinnur demanta úr árseti og Demantaskrifstofu ríkisins (1959), sem annast útflutning demanta.  Þarna er einnig stór markaður fyrir landbúnaðarafurðir mendefólksins og aðalmiðstöð timburviðskipta í landinu.  Kakó- og kaffibaunir, pálmaolía og kjarnar, húsgögn og tréskurðarmunir eru aðallega fluttir um þjóðveginn til Freetown til sölu og útflutnings.  Kirkjur, einkaframhaldsskólar, katólskur kennaraskóli fyrir konur, tækniskóli, ríkisbókasafn og einkasjúkrahús eru í borginni.  Áætlaður íbúafjöldi 1985 var tæplega 53 þúsund.