Soweto er borg í Gautenghéraði í grennd við Jóhannesarborg.  Hún var skipulögð fyrir svertingja, aðallega af kynþáttum xhosa og zulu.  Nafnið er skammstöfun fyrir „South-Western-Townships”.  Árið 1976 efndu íbúarnir til mikilla mótmæla gegn notkun tungumálsins afrikans í skólum og gegn stefnu stjórnarinnar í aðskilnaðarmálum.

Mótmælin á níunda áratugnum komu fram í fjöldasamkomum, verkföllum og stöðvun húsaleigugreiðslna.  Soweto er yfirfull af fólki og húsnæðisskorturinn gífurlegur.  Áætlaður íbúafjöldi 1991 var tæplega 600 þúsund en raunveruleg tala er ekki undir 2 milljónum.