Meknes er borg í miðnorðurhluta Marokkó.  Hún er u.þ.b. 110 km frá Atlantshafi og 58 km suðaustan Fez.  Hún er ein fjögurra konungsborga landsins.  Meknassa-berbaættbálkurinn Zanatah stofnaði hana á 10. öld umhverfis virkið Takarart og skírði hana Meknassa ez-Zeitoun (Ólífuborgin Meknes).  Meknes varð höfuðborg landsins árið 1673, þegar Maulay Ism’il var soldán.  Hann bygði hallir og moskur, sem áunnu borginni nafnið Versalir Marokkó.  Borgarmúrar hans með fjórum hornturnum og níu hliðum standa enn þá.  Að honum látnum hallaði undan fæti fyrir borginni.  Árið 1911 lögðu Frakkar hana undir sig.  Þeir byggðu nýjan borgarhluta handan Bou Fekrane-árinnar.  Meknes státar af voldugum og fögrum byggingum, s.s. Roua-hesthúsunum, þar sem 12.000 hestar voru geymdir og fögrum görðum, sem vatni er veitt á úr 4 hektara lóni.

Meknes er viðskiptamiðstöð fjrósams landbúnaðarhéraðs og einnig handiðnaðarmarkaður (útsaumur og teppi).  Berbakonur í Mið-Atlasfjöllum eru afburðateppavefarar.  Gott vega- og járnbrautasamband er milli Meknes, Fez, Tangier og Casablanca.  Rústir hins rómverska Volubilis og hinnar helgu borgar Idris eru í næsta nágrenni.

Vínber, korn (aðallega hveiti), sítrusávextir, ólífur, sauðfé, geitur og nautgripir eru rætkaðir umhverfis borgina.  Flúorít er unnið úr námum í grenndinni.  Áætlaður íbúafjöldi árið 1982 var 320 þúsund.