Timbuktu eða Tombouctou er borg við suðurjaðar Saharaeyðimarkarinnar, rétt norðan stóru bugðunnar í Nígerfljótinu.  Borgin er tengd fljótinu með skurðum og þar er smáhöfn, sem kallast Kabara.  Borgin er héraðsmiðstöð verzlunar með salt og aðrar nauðsynjavörur.  Fáskrúðugur iðnaður borgarinnar byggist á framleiðslu vefnaðarvöru (baðmull), leðurvöru og leiríláta.

Fyrrum var Timbuktu mikill verzlunarstaður og miðstöð islamskra fræða.  Tuareghirðingjar stofnuðu borgina líklega síðla á 11. öld.  Snemma á 14. öld, þegar hún var innlimuð í hið forna konungsríki Malí, var hún mikilvægur áfangi á leið úlfaldalesta yfir Sahara og dreifingarmiðstöð við efri hluta Nígerfljótsins.  Eftir að hið volduga Sonhai-veldi náði borginni undir sig 1468, lifði hún sitt mesta blómaskeið sem miðstöð viðskipta og islam.  Íbúafjöldinn var í kringum 40 þúsund snemma á 16. öld.  Kaupmenn frá norðurafrískum borgum seldu salt og dúk gegn greiðslu í gulli og svörtum þrælum á markaðnum.  Sankoré-moskan stofnaði trúarbragðaskólann og sótti fræðimenn í islömskum fræðum til beztu menntastofnana á þessu sviði í Mið-Austurlöndum.

Árið 1591 náðu innrásarmenn frá Marokkó borginni á vald sitt og hnignun hélt innreið sína, bæði vegna árása fólks af kynþáttum bambara, Fulani og tuareg og viðskipta, sem fluttust til annarra borga.  Í upphafi 19. aldar var Tumbuktu ekki stór bógur.  Frakkar hernámu hana á árunum 1893-94).  Áætlaður íbúafjöldi 1987 var tæplega 32 þúsund.