Mahajanga er mikilvæg hafnarborg í norðvesturhluta landsins við ósa Betsibokaána, sem hverfur þarna í Bombetokaflóa.  Mahajanga var höfuðborg konungsríkisins Boina á 18. öld.  Frakkar lögðu borgina undir sig 1895 í upphafi hernáms eyjarinnar.  Gamli borgarhlutinn er aðallega niðri við höfnina og þar standa enn þá nokkur arabísk hús frá 19. öld.  Nútímabyggingar borgarinnar eru m.a. katólsk dómkirkja, samkomuhús mótmælenda og moska.  Borgarháskólinn var stofnaður 1977 sem útibú frá Madagaskarháskóla en varð sjálfstæður 1988. 

thafnalífið við höfnina byggist aðallega á umskipun og hún er í vegasambandi við Antsiranana og Antananarivo (360 km ssv.).  Skammt untan borgar er flugvöllur.  Iðnaðurinn byggist á vinnslu landbúnaðarafurða, niðursuðu kjöts og framleiðslu sápu, sykurs og sements.  Innflytjendur frá Kómóroseyjum voru næstum jafnfjölmennir og innfæddir (Malagasy) í borginni til 1976-77, þegar flestir hinna fyrrnefndu snéru aftur heim eftir óeirðir.  Kómórobúum hefur fjölgað á ný í borginni og þar býr einnig talsverður fjöldi indverskra kaupmanna.  Í héraðinu umhverfis borgina er talsvert ræktað af kaffi, hrísgrjónum, sykurreyr, hnetum (cashew), kassava, baðmull og raffíapálmum.  Fiskveiðar og harðviðarvinnsla eru einnig mikilvægir atvinnuvegir.  Áætlaður íbúafjöldi árið 1993 var tæplega 101 þúsund.