Antsiranana er borg, sem þróaðist úr franskri sjóherstöð nyrzt á Madagaskar, á skaga við fjarðarenda sunnanverðan.  Efnahagurinn byggist enn þá á slippum hersins og umskipun vöru milli strandferðaskipa og hafskipa.  Iðnaðurinn byggist aðallega á skipasmíðum og viðhaldi skipa.  Framleiðsluvörurnar eru helzt sápa, salt, efnavörur og matvæli.  Borgin er mikilvægt setur Madagaskarháskóla (1977).  Anamakiaflugvöllurinn er 10½ km suðvestan borgarinnar og um hann fer talsvert innanlandsflug.  Sunnan borgarinnar eru skógi vaxin Tsaratanana-fjöllin með hæsta tindi landsins, Maromokotra (2876m).  Flestir íbúanna þarna búa á láglendinu við austur- og vesturströndina.  Vegur liggur meðfram austurströndinni.  Ankara-hellernir sunnan borgarinnar eru meðal áhugaverðustu staða héraðsins.  Talsvert er ræktað af hrísgrjónum, kassava, kartöflum, jarðhnetum og sykurreyr.  Í suðausturhluta héraðsins er mikið ræktað af vanillu.  Áætlaður íbúafjöldi 1993 var tæplega 47 þúsund.