|
 El-Alamein er 110 km vestan Alexandríu.
Þangað liggur góður malbikaður vegur og járnbraut.
Meðal gististaða þar er Hótel Sidi Abd el-Rahman, 64 herbergi
og hús. El-Alamain á frægð
sína að þakka falli Rommels og skriðdrekasveita hans í stórorrustu
við bandamenn árið 1942. Þar
féllu og særðust u.þ.b. 80.000 hermenn og þar eru geysistórir stríðsgrafreitir
og minnismerki.
Erwin
Rommel (1891-1944) kom sem sigurvegari alla leið frá Tobruk í
fararbroddi þýzk-ítölsku skriðdrekasóknarinnar 10. júlí 1942 og
tókst að styrkja stöðu sína við El-Alamein með því að ná hæð
nr. 26 undir sig. Bretar stöðvuðu frekari framrás Rommels til Kaíró og vörðust
á víglínu milli El-Alamein og Kattaralægðarinnar. Áttunda herdeild
brezka hersins undir stjórn Montgomerys og Alexanders hershöfðingja hóf
stórgagnsókn 23. oktober (önnur orrustan), sem knúði Rommel til að
hörfa 4. nóvember, þvert ofan í skipanir Hitlers.
Þar með tryggðu Bretar sér hernaðarlega yfirburði í Norður-Afríku
og möguleika til innrásar í Ítalíu sunnanverðri.
Í
brezka kirkjugarðinum liggja 7500 hermenn.
Þar er stór steinkross. Handan
vegar er gistihús. U.þ.b.
hálfan km frá kirkjugarðinum er stríðsminjasafn með vopnum, skjölum
og skýringum á atburðum. Í
safnsgarðinum eru farartæki, skriðdrekar og brynvagnar auk þungavopna.
Þegar
lengra er haldið, birtast sandfylltar skotgrafir og byrgi auk annarra
ummerkja frá 1942 báðum megin vegarins til Mersa Matruh. Tíu km vestar, á hæð skammt frá sjó, er þýzka
minnismerkið frá 1959, átthyrnd bygging, sem reist var með ítalska
kastalann Castelk del Monte í Puglia á Suðaustur-Ítalíu að
fyrirmynd. Umhverfis garðinn
inni í minnismerkinu eru 7 veggjaskot með minningargröfum og nöfnum
þýzkra landsvæða. Þar
fyrir ofan eru bronstöflur með nöfnum hinna föllnu.
Undir veggjaskotunum eru jarðneskar leifar 4280 af hinum 4500,
sem féllu. Í miðju garðsins
er 11,5 m hár einsteinungur úr þýzku blágrýti.
Fjórum
km vestar er ítalska minnismerkið, sem er grafhýsi með háum miðturni
úr hvítum marmara. Þar
hvíla hinir föllnu í merktum gröfum að hluta og víða má sjá
eftirmæli vandamanna þeirra.
Árið
1966 fannst mikil olíu í grennd við El-Alamein og farið var að nýta
hana árið 1968. |
