Tveir stærstu þjóðfélagshóparnir eru Sómalar og Afar.  Báðir eru sunnítar og tala skyld austur-kússítatungumál, þótt þeir skilji ekki hvorn annan.

Afarnir (Denakil eða Danakil) tala tungu, sem blandast mállýzku Saho.  Saho-Afar er venjulega flokkað sem austur-kússískt tungumál af afro-asískum stofni.  Afarnir búa á strjálbýlum svæðum vestan og norðan Tadjoura-flóa.  Þetta svæði nær yfir hluta nokkurra fyrri soldánadæma þeirra.  Hlutverk soldánsins nú á dögum er að mestu bundið gömlum hefðum og stéttaskiptingin innan þessa þjóðfélagshóps er á undanhaldi.

Sómalarnir, sem tala einnig austur-kússískt mál, búa aðallega í höfuðborginni og suðausturhluta landsins.  Þeir halda tryggð við stórfjölskylduna.  Rúmlega helmingur þeirra eru af Issafjölskyldunni og flestir hinna eru af Gadaboursi- og Issaqfjölskyldunum.

Dibouti-borg hefur löngum verið aðsetur araba frá Jemen og þar býr einnig fjöldi tæknimenntaðra ráðgjafa frá Frakklandi auk hermanna.  Síðustu áratugina hafa Eþíópar, Grikkir og Ítalar bætzt í hópinn.